Unya, sa mga libro iyang mabasahan, daghang mga ideya ang motumaw sa iyang alimpatakan. Tigtampuhan man siya’g mga sugilanon sa Banat News. Mga bargain books iyang pamaliton. Kay barato. Ug labing minus, makahuman siya’g basa, usa ka libro sa usa ka semana.
Giisip niyang diversion o hobby ang pagsulat og sugilanon. Palahi sa malaay niyang trabaho sa computer. Maglabi ang trabaho nilang bana’g asawa sa balay. Computer lang ang gamit. Kay si Marvin usa ka arkitek si Sheryl usa ka Interior Designer.
Karong sayong kahapunon, Sabado, samtang tua sa grocery section sa mall si Sheryl, nang-hunting og libro si Marvin. Mura siya’g nanginhas sa tindahan og libro. Nangukay sa mga bargain books. Kay wa pa siya kahibawo kun unsay iyang makit-an nga ganahang basahon.
Nasurprisa siya nga nakakita og hardbound nga libro. Duha ka pulgada ang gibag-on. Dunay litrato ni Michael Parkinson sa atubangan nga cover. Biography ni Michael Parkinson ang maong libro. Dili ordinaryong tawo si Mr. Parkinson. Usa siya ka journalist, talk show host ug editor sa sikat nga mantalaan sa London. Dili ka tuo si Marvin nga P10 ray presyo sa libro mahitungod sa kinabuhi sa usa ka importante, sikat ug inila nga tawo.
Gipalit dayon niya ang maong libro. Kay nasayod siya nga ang bili sa kasayurang iyang mabasa sa libro, dili kay P10 lang. Labing minus, usa ka libo ka pesos. Ang papel jacket ug cover sa libro, di kay diyes pesos lang ang balor sa materyales niini. Ganansiya kaayo siya niini.
Dinhi sa dakbayan, ang Banat News may P7 kasagaran nga presyo. Kapin kun kulang may 16 ka pahina ang mantalaan. Kining libroha karon iyang napalit, may sobra 400 ka pahina. P10 lang. Labaw lang og P3 sa mantalaan.
Mapahiyumon nga nigawas si Marvin sa tindahan sa libro bitbit ang baga nga libro nga bag-o lang niyang napalit. Sa pagkatinuod, naluoy siya sa libro nga gipresyohan na lang og ubos kaayo. Mapinanggaon si Marvin og libro. Ug di siya gustong mapalit ni og lain. Kay tungod sa kabarato sa presyo, ang laing makapalit, dili moamping sa libro.
Iwasiwasi lang seguro sa laing makapalit. Samtang si Marvin, may safety nga lugar iyang butanganan ining libroha ini’g human niya og basa. Kay usa siya ka book lover o bookworm. (Kataposan)