Pro Bono

Gitawag sa court interpreter ang kaso nga husayon na sa husgado niining buntaga. “Civil Case No. 121156, Parolos versus Redondo, for annul-ment of sale!” nilanog ang tingog ni Owen, interpreter sa RTC Branch 65.

Gitawag pag-una ang maong kaso kay unang nangabot sila si Atty. Bert Oljos ug Atty. Nilo Omol, ang nag-atbang nga mga abogado sa maong kaso. Polisiya ni Judge Cathy Inso nga first-come-first-served.

“Appearance?” ni Judge Inso.

“For the plaintiff, Your Honor” ni Bert dungan sa pagtindog. “For the defendant, Your Honor” matud sab ni Nilo. “What happened to the negotiation for settlement in this case?” sa huwes.

Nitan-aw sa duha ka abogado. Niduko si Nilo ug huyhoy ang iyang mga abaga. Wa man gyud siya makakuwarta niining kasoha mao nga gikombinsi na lang niya ang iyang kliyente nga makig-areglo na lang aron mahunong ang kaso.

Kay silingan ug kababata niya si Celsa Redondo, giutang ang iyang acceptance ug mga appearance fees. Sulod sa upat ka tuig, sige og ka-postpone ang mga hearing.

Nikabat og P50 mil ang utang ni Celsa ug P100 mil ang gipangayo alang sa areglo. Gikapoy na si Nilo og tinambong sa kaso kay mosamot kadako ang utang sa iyang kliyente nga way seguro makabayad.

Nakapalit si Celsa og yuta nga sinunod sa mga herederos. Wala kapirma ang tanang heredero. Si Ben Parolos wala kadawat og bahin sa halin mao nga nikiha ug nangayo og P100 mil.

Nihatag tuod og P100 mil si Celsa ngadto ni Nilo apan nangama pa gyud ni Fiscal James Abanico. Gipamonitor si Nilo kun ihatag ba gyud ang kuwarta sa kihante. Absent si Celsa.

“For the records, Your Honor, I have now in my possession the sum of P100,000 ready to be handed over to Atty. Oljos,” ni Nilo. “Very good compañero. I really admire lawyers who aid in settling cases amicably,” sa huwes, mapahiyomon.

“Half of this amount Your Honor, is my supposed attorney’s fees which I waived to make this settlement possible,” ni Nilo.

“Let’s give Atty. Omol a big hand!” sa huwes. Namakpak hapit tanang tawo sulod sa husgado.

Pagkahilom. “There are times that a lawyer has to serve pro bono. And this is one of those times” ni Nilo nga nitunol sa kuwarta kang Atty. Oljos. Nisamot kadaghan ang namakpak.

“We should follow Atty. Omol’s example,” sa huwes. Ang mga pagdayeg ug pasidungog nakahanaw sa kabug-at sa galamhan ni Nilo. (Kataposan)