Naguol si Inse Tasia kay karong umaabot Sabado mao man ang adlaw’ng natawhan o birthday sa iyang apo nga si Engkoy.
Wala nay amahan si Engkoy kay namatay didto sa Manila, gipareglahan ug si Sedes nga iyang inahan nalisoan sa maayong pangisip ug tua karon sa mental hospital. Naguol si Inse Tasia kay naatol man god nga wala gyu’y nakobra si Pilong nga iyang bana.Tungod sa kadaghan sa mga deduction sa iyang payroll maong na-overdraft kini. Naa pay iyang giutangan nga nagsige’g abat-abat niya kay taudtaod na man kining mao niyang utang.
“Dong, Dong Engkoy, luoy kaayo ka, Dong, kay dili ko makapa-birthday nimo. Wa mi nahot ron. Way suweldo si lolo nimo Pilong. Maayo na lang unta to’g duna pay manok, apan bisa’g manok wala gyud...” Kahilakon si Inse Tasia nga mipahayag ngadto sa iyang apo.
Inay maguol si Engkoy mipahiyom hinuon kini. Nagpangidaron na’g diyes anyos si Engkoy, ug mag-Grade 6 na siya sunod abli sa klase.
Pagka hapon, wala si Engkoy. Hangtod nga mitikyop na lang ang kilomkilom, wala gihapon ang apo ni Inse Tasia. Pagka alas otso mipauli si Engkoy. Ug may dala, usa ka pulseras nga mura’g karaan ang desinyo ug medyo may pagka bulawan ang kolor. “Lola, nia, o, gihatagan ko’g pang-birthday gift sa akong amigo,” ni Engkoy pa. “Maka-birthday na gyud, ko, Yaheeeee...”
“Uy, bulawan man ang iyang tibuok bulok, tinuod kaha ni, ha diin man ka ini, kinsa may naghatag nimo ini, ha?” mikunot ang agtang ni Inse Tasia. Tuod, dihang gisuway og pakita ni Inse Tasia sa ahensiya sa mga alahas ingon sa nanagko ang mga mata sa alahira.
“Hapit kuyapi si Inse Tasia kay bulawan man diay tong maong pulseras. Alegre kaayo ang birthday ni Engkoy. Unya nahilom sila dihang may miabot usa ka tawong gamay kaayo. Ug may taas nga bungot. Iyang gigakos si Engkoy ug gihagkan ug mibarog lang kini nga wala maglihok, mura’g maulawon.
“Lola, mao ni siya si Pengyot, ang higala kong duwende nga nagpuyo sa likod sa karaang kapilya. Buotan ni siya, lola, ug daghan kaayo siya’g mga alahas, lola, mga walo ka kaban, pulos puno...’ ni Engkoy nga mikugos sa gamay’ng tawo. “Ugma, lola, iya kong dad-on, apan mobalik ko dinhi sa ato ug dad-an ko kamo’g mga alahas nga hinatag ni Pengyot...” Tuod, usa ka adlaw’ng Biyernes, nawala lang si Engkoy. Ug dihang giadto ni Inse Tasia ang karaang kapilya, maoy iyang nakit-an si Engkoy nga naghigda sa may gamot patay’ng kahoy ug nagkumkom og daghang mga bulawang mga alahas. Sukad niadto, sila na si Inse Tasia ang labing dato sa ilang dapit. (Katapusan)