Mutya sa bukid

Gula 6

Dali ra nga nakaluto sa ilang pagkaon si Nang Celia kay gitabangan man siya ni Sheila. Nakadayeg kaayo sa dalaga ang inahan ni Ramon.

“Maayo ka man diay nga mangluto Sheila. Sigurado nga ganahan g’yud nga mokaon karon si Ramon,” matud ni Nang Celia. Gitug-anan ni Nang Celia si Sheila sa kinaiya sa iyang anak ulitawo.

“Buotan kana si Ramon apan dili siya ganahan og bakakon. Daghan na siya og mga amigo nga wala na g’yud takda human niya mahibaw-i nga namakak kaniya,” giingnan ni Nang Celing si Sheila.

Wala masayop si Nang Celing kay nakagusto g’yud si Ramon sa ilang giluto. Pagkasayod niini nga mitabang diay si Sheila sa pag-andam sa ilang makaon, mipahiyom kini sa dalaga.

“Tan-awa Ma, wa gyud ko masayop sa pagdala ni Sheila dinhi sa ato aron nga may makaabag na kanimo sa gimbuhaton. Sukad karon Sheil, dinhi ka na lang sa balay, ako na ang mahibawo nga mosweldo nimo,” matud ni Ramon.

Gihimo ni Sheila ang gimbuhaton sa balay. Sayo kaayo siya nga mibangon ug nanglimpyo sa palibot. Pagmata ni Ramon, nakita niya nga limpyo na ang palibot sa balay.

“Kabuotan nimo Sheil uy, kanindot unta kun sama kanimo ang akong mapangasawa,” matud ni Ramon nga nagbitbit og tasa nga may sulod nga kape. Mipahiyom og hilaw si Sheila nga nakadungog sa pagdayeg kaniya ni Ramon.

Pagkahapon, mapahiyumon ang inahan ni Ramon nga misugat sa anak nga gikan sa trabaho. “Buotan g’yud kaayo kini si Sheila, dong. Gipanglabhan niya ang tanan nato nga mga bulingon,” matud ni Nang Celia. (Sumpayan)