Si Herminia na lang ang nagpuyo sa karaan nilang balay. Ang iyang duha ka igsuon namatay sa usa ka sakit nga kahibulongan ug unya ang iyang tatay Osto ug nanay Joving namatay usab sa sakit nga kolera nga mikaylap sa ilang sityo.
Tungod niini, si Herminia na lang ang naa sa ilang balay. Hinuon, wa’y problema si Herminia kay siya man ang nakasunod sa katigayonan sa iyang ginikanan. Mitrabaho si Herminia pagka teller sa banko kay nakahuman man siya og kurso nga Commerce major in Accounting, mao nga gabii na siya nga mauli.
Usa ka gabii samtang nanirado si Herminia sa mga bentana sa iyang balay, kalit lang may dakong kabog nga misakdap ug unya kalit nahimong tawo nga nagtindog na sa may tugkaran.
“Herminia, ako si Marildo, ang lalaki nga gitap-il-tap-il nilang nanay ug tatay nimo ug nagkasabot sila nga kun maulitawo ug dalaga na kita, kita gyud ang magminyo,” nagkanayon si Marildo.
“Guwapa man diay ka, Herminia. Ang imong mga ngabil daw ang tambis nga mapula ug ikaw g’yud ang angay kanako.”
“Dili, dili ko nimo, kay usa ka wakwak. Dili ba misakdap ka man gani nga usa ikaw ka kabog ug karon nagpakatawo ka na? Dili ko gusto’g ungo. Busa Marildo, ayaw na padayona ang imong tumong,” matud ni Herminia.
Unya ingon sa kalit lang nahimong kabog si Marildo ug milupad. Taudtaod miabot si Benigno, ang hinigugma ni Herminia. Nakasaksi diay siya sa duroha ug gibati siya’g kabalaka.
“Herminia, magpalayo ta gikan dinhi,” ni Benigno pa.
“Oo, Benigno, dad-a ako bisa’g asa, kay mobalik unya kadtong mangtas nga buot moangkon kanako,” ni Herminia pa nga migakos kang Benigno.
Wala kaagwanta si Benigno sa iyang gibati, gihagkan niya si Herminia sa halok nga tugob sa paghigugma. Mihangos si Herminia. Ug ang pula ug nindot kaayong mga ngabil ni Herminia, kalit lang nahimong itom ug misiga ang mga mata ni Herminia, “Ahhh... Benigno...naunsa man koo...ahh” ug nahimong laksot si Herminia. Si Benigno ingon sa kandila nga giugbok sa iyang gilingkoran.
Wala siya makatuo sa iyang nakita nga si Herminia kaliwat diay og ungo ug karon dili na maayong tan-awon tungod sa iyang kalaksot. Didto sa dakong sanga sa akasya nagbatog si Marildo nga usa na usab ka wakwak ug gitawag si Herminia.
“Herminiaaaa...wakkkk..wakkk! dali na manglupad na ta!” (Kataposan)