Gula 3
Milabay ang pipila ka adlaw, nahuman na ang upat ka adlaw nga leave ni Ramon. Mibalik na siya pag-report sa iyang trabaho.
“Bai Mon, may babaye ra ba to nga mianhi og nangita nimo. Hitsuraan ra ba to bai,” matud sa guwardiya nga higala ni Ramon. Nakahinuktok siya og kadiyot ug naghuna-huna kun kinsa ang babaye nga nangita kaniya.
Nagtuo si Ramon nga ang nangita kaniya mao ang tindera og mangga sa unahan nga nakuhaan niya’g lima ka kilo nga prutas ug wala niya mabayri kay walay sensilyo.
Pagka hapon, mitingog ang intercom sa lamesa ni Ramon. Ang guwardiya diay ang nanawag ug nagpahibalo nga mibalik na usab kadtong babaye nga nangita kaniya.
Mibarug si Ramon ug nanaog. Pag-abot niya sa entrance, misugat sa mga mata ni Ramon si Sheila nga gikaila niya pag-adto niya sa Barili. Nagpahiyom ang dalaga nga mitindog ug misugat kang Ramon.
“Nag-leave ka diay sir?” si Sheila maoy miuna pagtimbaya. Nagtupad sila sa paglingkod.
“Unsa’y ato? Nasuroy ka man Sheil? Gidayon g’yud diay nimo ang imong giingon nga mobiya ka sa inyo?” matud ni Ramon nga mitutok kang Sheila.
Sa iyang tan-aw mura’g gikapoy ang dalaga. “Kagahapon pa ko nga miabot dinhi sa siyudad. Dinhi dayon ko mideritso nimo kay wala man ko’y kaabtan,” ni Sheila pa.
Nakabantay tuod si Ramon nga may bag nga diha sa tupad ni Sheila. “Uy, mao ba? Unya diin ka man matulog gabii?” ni Ramon nga mahingawaon.
“Sa police station ra ko mipahuway. Magpatabang lagi unta ko nimo aron makasulod ko’g trabaho,” matud sa dalaga. (Sumpayan)