Mutya sa bukid

Gula 2

Nakasabot si Ramon sa gibati sa dalaga nga nahiubos kaayo sa iyang amahan tungod sa pagbaligya sa ilang binuhi nga kabaw. Wala makagusto si Ramon sa gihimo sa amahan sa dalaga nga gipiangan ang kabaw aron nga may rason nga ang hayop ibaligya ug ipaihaw.

Naluoy si Ramon sa anak nga dalaga sa maong tag-iya sa kabaw. Gusto kini nga mobiya sa ilang panimalay ug manarbaho sa siyudad tungod sa kahiubos “Unsa ang ngalan nimo day?” gipangutana niya ang dalaga nga nagpamahid sa iyang luha.

“Sheila sir,” mubo nga tubag sa dalaga. Gitutokan ni Ramon si Sheila ug gisukna kun matinud-anon ba kini sa iyang tinguha nga manarbaho sa siyudad.

Gikuot ni Ramon ang iyang pitaka og mikuha’g calling card. “Kun tua ka na sa siyudad, mahimo ko nimo nga makontak niini nga number kay basin og makatabang ko nimo sa pagpangita’g kasudlan,” matud ni Ramon nga mitunol sa calling card.

“Salamat,” matud ni Sheila. Tuod, diha nga nahurot na ang gipalit nga bibingka ni Ramon, mipadayon siya pagbiyahe sakay sa iyang bisekleta paingon sa Poblacion, Barili.

Gitug-an ni Ramon ngadto sa iyang mga ig-agaw ang iyang nasaksihan nga gituyo sa pagpiang ang kabaw didto sa Mantalongon. “Mao g’yud na ang sagad nila buhaton gaw,” matud sa ig-agaw ni Ramon.

Pagkasunod adlaw, sayo kaayo nga migikan si Ramon balik sa siyudad luwan gihapon sa iyang bisekleta. Pag-agi niya sa merkado sa Mantalongon, takulahaw lang nga nahandom niya si Sheila. (Sumpayan)