Gisukit-sukit ko sa tag-iya sa bakery nga akong giaplayan og trabaho pagka katabang sa panimalay.
Namakak ako sa atubangan ni Ma’am Vanny. Wala ko motug-an nga milayas ko sa amo. “Gusto ka gyud nga motrabaho?,” matud ni ma’am.
“Unta, ma’am kay gusto ko nga makatabang sa akong mga ginikanan,” giingnan ko si Ma’am Vanny.
Gidawat ko ni Ma’am Vanny isip katabang nila ni Sir Luis ug Ma’am Vanny Adriane. Sa una’ng adlaw pa lang nako sa pag-alagad kanila, namatikdan ko nga buotan ang akong mga agalon.
Nianang pagkahapon, samtang nanilhig ko sa lagwerta, may lalaki nga miduol kanako ug nakig-ilaila. Si Rafael nga driver sa pamilyang Adriane.
Namatikdan nako nga gaan kaayo ang akong buot ngadto kang Rafael. Nagpakisayod siya sa akong kaagi ug kun taga diin ko.
“Aw, taga Bohol diay ka? Taga Negros ko, Tayasan ang among lungsod,” matud ni Rafael.
“Nganong dili man lagi ikaw ang nag-drive sa gisakyan ni Sir Luis kaganinang buntag?” mipalain ko.
“Dili na siya magpa-drive nako. Si Ma’am Vanny ra ang magpa-drive nako, hatud kuha sa iyang gitrabahoan nga bangko,” ni Rafael. (Sumpayan)