Kapyot sa mahait nga suwab

Nasawilik ni Ekong ang iyang mga luha sa kapait ning iyang sitwasyon karon. Lisud na kaayo ang iyang kahimtang sukad siya gitaktak sa kompaniya nga iyang gitrabahoan tungod sa sala nga wala siya magbuhat.

Siya maoy gipasanginlan nga maoy nangawat sa mga lansang nga gipanghulog luyo sa koral sa kompaniya. Sila si Maning ug Korak nga maoy mga kawatan igo na lang sa pagpahiyom dihang gitaktak si Ekong sa trabaho.

Iya man gud nga gisanong ang hangyo nila ni Maning ug Korak nga  siya ang mohulog sa mga kinarton nga lansang sa likod sa planta, ug mao nga nasakpan siya sa guwardiya.

Maayo na lang kay wala pasakai og kaso si Ekong sa kompaniya ug igo lang siya nga giputbol nga wala’y pabawon bisa’g usa ka sentimo.

Dunggabon unta ni Ekong sila si Maning ug Korak apan nakahukom siya nga dili na lang kini niya buhaton kay mapriso man gyud siya.

Mikagot ang bag-ang ni Ekong sa kalagot diha nga wala nay pagkaon ang iyang pamilya. Unya gilantaw niya ang dakong balay sa dato nga insek sa unahan.

Daghan og negosyo kini si Insek Mokwang. Ang asawa niini nga si Eskit gitulis ug bisan nailhan ang mga tulisan apan gipasagdan na lang aron way samok.

Pagka gabii, gisaka ni Ekong ang balay ni Insek Mokwang apan nasakpan siya sa insek.

“Uyyy, hala, ikaw, Ekong, saka dinhi taas ako balay, imo ko tulison? Ikaw gutom ug ako imo tulison. Kamo man gud mga poble, tapolan, maong gutom mo, dili palihas namo mga insek nga mga kugihannn...!”

“Nia ko dinhi sa taas ninyo, Mo, kay giapas nako ang among iring, dinhi man gud paingon. Gitangag ang sinugbang isda,” pangatarungan ni Ekong.

“Ah, dili ko tuo Ekong. Ikaw nia dinhi taas kay imo ko tulison,” sa insek pa nga nagkayungit lang. “Bahala ka, Mo, basta kay nag-apas ko sa akong iring!” ingon sa gibati na’g kakulba si Ekong.

“Sige, kasabot man ko ikaw wala na tlabaho, gutom imo pamilya. Sige, duna ko sugo nimo. Imo sila patyon Maning ug Kolak kay mga tulisan sila, sila ang nagtulis ako asawa. Suholan tika singkuwenta mil, basta patay sila duha.”

Tungod sa kalisod, nahukman ni Ekong nga dawaton na lang ang gitanyag sa Insek kay sila si Maning ug Korak mao man sab ang nakaingon nga naputbol siya sa trabaho. (Kataposan)