Night market

Gula 19

Nakahilak sa kalipay si Alma ug iyang gigakus si Cesar pagkadungog niya sa gipamulong sa iyang amahan nga mohatag na kini og kagawasan sa ilang gugma.

Nasabot ni Cesar nga ang ubang kadugo ni Alma nga mga Muslim nga diha sa emergency room atol sa mao nga higayon wala makagusto sa hukom sa amahan sa dalaga.

Apan wala silay nahimo tungod kay hukom kini sa amahan ni Alma. "Miduol si Cesar sa amahan ni Alma ug miamen agi og pagyukbo. "Salamat kaayo Dong kay kun wala ka pa, dili gayud unta mahatagan og hustisya ang pagtulis kanako," matud sa amahan ni Alma.

Napugos pagtug-an si Alma sa iyang plano nga mouban na lang unta kang Cesar didto sa ilang dapit sa Leyte kay supak man ang iyang amahan sa iyang pakigrelasyon sa dili sama kanila nga Muslim.

"Buyno, kinahanglan nga makasal kamo sa labing dali nga panahon kay sigurado ko nga may nahitabo na g'yud kaninyong duha," matud sa amahan sa dalaga. Human makagawas sa ospital ang amahan ni Alma, mao gani kini ang naninguha nga makasal sila si Cesar ug ang iyang anak.

Tugob sa kalipay ang panag-uban nila ni Alma ug Cesar. Sa gabii sa ilang kasal, subli nga gidimdim sa bag-ong magtiayon ang katam-is sa gugma.

Wala nay bisan gamay nga kabalaka nga nagpahipi sa ilang kaisipan nga may mobungkag pa sa ilang pagminahalay. (Kataposan)