Gula 24
Wala madugay ang akong pagpaabot kay dunay sakyanang Adventure nga mihunong tungod sa bakery. Nanaog ang usa ka lalaki nga mga singkuwenta na ang edad.
Ang lalaki nga nanaog gikan sa Adventure mao diay si Sir Luis, ang tag-iya sa bakery nga akong gipalitan og pan. Gisultihan kini sa tindera sa bakery nga gusto ko nga mo-apply isip katabang sa ilang panimalay.
Kadiyot nga nakigsulti si Sir Luis kanako. Iya ko nga gisukitsukit bahin sa akong ngalan, ug kun taga diin ako. Gitubag ko ang tanan niyang pangutana. Pero wala ko siya tug-ani nga milayas ko gikan sa amo.
Gikuyog ko ni Sir Luis sa ilang balay sakay sa Adventure nga gipangunayan niya pagmaneho. Iya ko nga gipaila ngadto sa iyang asawa, si Ma’am Vanny.
“Pila na ang imong edad?” sukit ni Ma’am Vanny kanako.
“Sixteen pa, Ma’am,” mubo ko nga tubag.
“Uy, kabata pa ba diay nimo,” nakaingon si Ma’am Vanny. “Wa ka diay mo-eskuyla?”
‘W-wa lagi, Ma’am, kabos man gud ang akong mga ginikanan, wala sila’y ikagasto nako bisan sa pagtapos lang sa hayiskol,” matud ko. (Sumpayan)