Daman sa udtong tutok

Gula 18

Mibisita g’yud sila si tatay Barlo ug nanay Ludy kang kuya Cain didto sa bilanggoan. Sa ilang pagpauli gikang miduaw ni kuya Cain, nakigsulti sila kanako.

“Kun mahimo, ato na lang isibog ang kaso nga atong gisang-at batok sa imong maguwang,” matud ni nanay Ludy. Nakugang ako pag-ayo sa gisulti ni nanay.

Nahitutok ako nila ni tatay Barlo ug nanay Ludy. Wala ako magdahom nga mohangyo sila kanako nga isibog na lang ang kaso nga among gipasaka batok sa akong igsuon nga miunay sa pagbuong sa akong kadungganan.

Unsaon na man lang ang akong tinguha nga makabaton og hustisya ang akong gidangatan? Nakasukot ko sa akong kaugalingon.

“Dili mahimo, nay,” giingnan ko ang akong inahan.

Gipasabot ko ni tatay Barlo. “Pero, Darlene, gimahal namo ang imong maguwang. Dili kami buot nga maalaot siya. Ikaw? Makatugot ka ba diay nga madugta ang imong maguwang sa bilanggoan tungod kay giunay mo siya sa pagpabilanggo?”

“Apan unsaon na man lang ang iyang gibuhat kanako? Kalimtan na lang sa dayon? Giguba niya ang akong kaugmaon, Nay, Tay,” matud ko nga naghilak.

“Dili ka ba diay makapasaylo kaniya, anak?” ni nanay Ludy pa.

Wala ko motingog. (Sumpayan)