Night market
Pag-abot nila ni Alma ug Cesar sa SM, midalikyat sila pagsulod og kan-anan aron manihapon.
Wala na kaayo sila magsige’g sultihanay. Gusto ni Cesar nga mahuman sila pagdali aron mosulod na sila sa sinehan. Wala masayod si Cesar kun unsa nga salida ang ilang tan-awon, basta kay ang mahinungdanon kaniya mao nga makaparayeg siya kang Alma.
Diha pa lang gani sila sa ticket booth aron paglukat og tiket, giagbayan na ni Cesar ang dalaga. Gipasagdan ra usab siya ni Alma, apan usahay mabantayan sa ulitawo nga si Alma ingon sa kanunay lang magduko.
Nahuna-huna ni Cesar nga tingali nahadlok si Alma nga adunay mga kauban niya nga Muslim nga makakita nga nakig-uban siya’g Kristiyano nga wala itugot sa ilang kultura. Wala masayop si Cesar kay diha nga didto na sila sa sulod, miangkon si Alma nga gipanguyawan siya sa iyang gihimo.
Apan wala kini makapakgang sa ilang mainiton nga pagparayganay. Ang ilang sitwasyon nakapasamot sa kainit sa pagbati ni Cesar ngadto sa dalaga. Gipabatyag gayud niya kang Alma ang pagpangga.
Taliwala sa nagpungasi nila nga pagparayganay, nakabantay si Cesar nga naghingapin na ang iyang kaagresibo. Gusto na niya nga angkunon sa hingpit si Alma. Mura’g mikusog ang pitik sa iyang kasing-kasing. Mipaspas ang pagginhawa ni Cesar.
Duna siya’y gihunghong kang Alma diha nga milunga siya makadiyot sa pagparayeg. “Ha? Hala dili ko uy, mahadlok ko,” paraygon kaayo nga tingog ni Alma. “Sige na gud, ayaw ko’g balibari,” nagpakiluoy g’yud si Cesar. (Sumpayan)
- Latest
