Apo sa mangtas nga gipareglahan

Hilomon nga pagka-ulitawo si Asnugo, apan buotan siya. Dili siya pareho sa uban nga teenagers nga bugalbugalon ug unya nag-apil-apil na sa paggamit og gidili nga drugas sama sa shabu.

Walay bisyo si Asnugo. Ang iyang panahon anaa lang sa uma. Kun anhaon siya’g higala maayo siya nga moabi-abi ug mabuhong g’yud inigpauli kay iyang lutoan og manok bisaya nga paresan sa bag-ong binuyok nga binlod.

Ang iyang suod nga higala mao si Fructoso o Tusoy. Pareho sila’g edad apan ang nakalahi lang nila kay kiaton si Tusoy, dili sama ni Asnugo nga buotan ug kugihan.

Gani, sa iyang pagkakugihan hilom nga naibog kaniya si Edna, ang anak dalaga sa magtiayong Ansang ug Bentong nga maoy tag-iya sa kasigpit nga yuta sa giuma ni Asnugo.

Matag hapon, anhaon g’yud siya ni Edna. “Lahi ra kaayo ka sa uban dinhi nga mga ulitawo sa ato, As. Dia ra g’yud ka sa imong uma samtang ang uban nga sama nimo’g pangedaron, sige lang og hubog-hubog, inom-inom, suyop og shabu,” ni Edna.

“Natawo ko sa sabakang kabus, Ed, busa ang kakugi maoy anaa nako, kay pobre lagi, aron duna ko’y makaon matag adlaw,” hinay nga pulong ni Asnugo.

Wala pa gani mahuma’g sulti si Asnugo miabot si Adan, ang bagis dinhi sa ilang sityo nga maoy giilang lider sa mga batan-on nga badlungon sa katilingban.

“Uy, Edna, nia ka man diay dinhi sa payag niining tawo nga nanimaho’ng lapok sa lunangan,” ni Adan pa.

Datu ang mga ginikanan ni Adan kay adunay daghang negosyo sa siyudad. Kuyog ni Adan karon ang iyang lima ka hinanib.

“Ikaw, nia ka man ‘sab dinhi,” ni Edna pa nga naglagot. Wala man gud sugta ni Edna kini si Adan maong nagsige ni’g sunodsunod kaniya ug maniid kun asa siya paingon.

“Ikaw, ikaw ang akong gisundan, Ed,” ni Adan nga nagpahiyom. “Ug nia pud mi aron pagkulata niining tawo nga baho’ng lapok.”

Ilang gikuptan si Asnugo apan gilambiyong ang tulo ka kauban ni Adan ug gisunod ang laing duha, dayon gibali ni Asnugo ang tuong bukton ni Adan kinsa mipiliik sa kasakit.

“Ayyy! mamatay na ko niini!” midagan si Adan.

Diha nga layo na ang mga bagis, si Asnugo miingon, “Ako ang apo ni Barong mangtas. Andam ko nga mopatay og tawo nga mga salbahis.” Sa nabati ni Edna gikulbaan siya. (Kataposan)