Wala nay laing babaye nga makatandog sa iyang pagbati kondili si Alma lang. Oo, sukad pa kaniadto sa elementarya pa sila, hilom na niyang gimahal si Alma.
Karon nga ulitawo na siya ug si Alma dalaga na, misamot ang iyang pagmahal niini. Apan wala siya'y gihimo, kondili igo lang sa pagsunodsunod.
Iyang sundan si Alma bisa’g asa kini molakaw? Sa mga social gathering, tua pud siya. Sa tanang mga lakaw ni Alma kanunay niya kining sundan nga wala mahibaw-i sa dalaga.
Ka usa, nga nagabhian si Alma ug naglakaw kini sa awaaw nga dalan paingon sa ilang balay, gisugat ang dalaga og duha ka adik, gikuptan aron panamastamasan.
Kay usa man siya ka polis, iyang gipamusil sa tiil ang duha ka adik. Nakadagan tuod, apan samaran.
“Elmer! Ikaw diay, salamat. Imo diay ko nga gisundan?,” ni Alma nga mitutok sa ulitawo. “Oo, kay nakita ko man ikaw sa imong pagkanaog sa mini-bus. Sa sunod, ayaw na pag-inusara nga maglakaw labi na kun lawom na nga gabii.”
Mipahiyom si Alma. Nalibog g’yud si Alma ngano nga kanunay man magsunodsunod kaniya si Elmer?
Ka usa, iya kining nasigpatan sa usa sa mga party nga iyang gitambongan, ug diha nga nag-atang na siya’g taksi kay mopauli na, iyang nasiklapan si Elmer nga diha sa may atbang naglantaw kaniya.
Ngano man nga kutob ra man kini sa pagsunodsunod kaniya nga abli man unta ang ganghaan sa iyang kasingkasing? Talawan ba si Elmer? Nanghupaw si Alma sa hilom.
Si Arthur nga kauban ni Alma sa opisina mipadayag na sa iyang gibati kaniya, apan wala pa kini niya pasaligi.
Usa ka gabii sa iyang pagpauli human siya mag-overtime, giagda siya ni Arthur nga mosakay sa kotse. Misakay na lang si Alma.
Apan gidala ni Arthur si Alma sa usa ka motel. Milugnot si Alma apan gisuntok siya ni Arthur ug nalipong. Sa nagkahanap niya nga panan-aw, nakita ni Alma si Elmer nga mibunal sa tangkugo ni Arthur sa pul-an sa pistola.
Sa sunod nga mga gutlo, diha na siya sulod sa taksi ug si Elmer na ang tupad kaniya. Pag-abot nila sa balay ni Alma, gipangutana ni Alma ang ulitawo.
“Elmer, mahal mo ba ako?” usa kini ka prangka nga pagpangutana. Miyango si Elmer. “Oo, mahal ug gihigugma ko ikaw, Alma. Kaniadto pa, apan nahadlok ko nga inigkasayod nimo imo ko nga likayan.” (Katapusan)