Ngiyawwww! ngiyawww! nabati na pud ni Goding ang ngiyaw sa iring. Lagot kaayo si Goding ning maong iring kay alingugngog kaayo ug nanukad sa gibutangan niya sa iyang mga manok.
Midali’g tindog si Goding ug nanaug dala ang hait niyang pinuti. Ngitngit kaayo kay wala pa mosubang ang buwan, busa, nagdala siya’g flashlight.
Tuod sa iyang paghiduol sa payag nga duol ra sa ilang balay, nakita ni Goding ang usa ka iring itom nga nag-usap na sa unod sa manok niyang dumaga ug may nakita pa siya nga upat ka manok nga mura’g nakuniskunis ug wala na’y mga tinai.
“Animal ka mangtasa ka!” milanog ang tingog ni Goding nga mihuyad sa iyang hait nga pinuti aron tigbason ang iring itom.
Apan abtik kini nga milikay ug miambak paingon kang Goding. Gipangawras si Goding sa iring nga puwerte’ng nakapanagang ug nanigbas apan wala makaigo sa iring.
“Godinggg! Unsa na, uy! Unsa nang imong gitigbas diha!” singgit sa iyang asawa nga si Crising nga nakakita ni Goding nga mura’g nanghabas sa hangin.
“Crisinggg! Tabanggg! Gibugno ko’g iring mangtas! Gitukob ang atong mga manokk!” lanog ang tingog ni Goding.
Layo man gud pud og mga silingan kini sila si Goding ug Crising. Kining ilang balay nahimutang sa kilid sa usa ka bungtod ug mingaw pa g’yud kining dapita. Nanaog si Crising nga nagdala pud og hait nga sundang aron pagtabang kang Goding. Unya kalit lang nga midagan ang iring itom pahilayo kanila.
Tungod sa kahadlok, nanaka na lang sa ilang taas ang magtiayon ug nanarangka sa pultahan sa ilang balay.
Pagka-ugma, miabot si Violeta nga nagpuyo sa taluktok sa bungtod ug nagdalag garapa nga mura’g dunay sulod nga lana.
“Goding, nia ko’y dala nga lana, itambal ni sa mga kinawrasan sa iring.” Dihay pahiyom nga mihulma sa mga ngabil ni Violeta.
Gidawat kini ni Goding ug unya nagpasalamat. Dali ra naayo ang mga kinawrasan sa iring diha sa mga bukton ug liog ni Goding.
Pagkasunod gabii, kay wala man si Crising sa ilang balay karon, nakalugar og adto si Goding sa payag ni Violeta sa taluktok sa bukid ug didto maoy iyang nakita nga si Violeta inanay nga nahimong iring itom.
Sa nakita si Goding, nakatuaw siya, “Violeta ikaw diay ang iring nga mangtas! Ungo ka diay, Violita!”
“Oooo, Goding, ako ang mangtas nga iring!” tubag ni Violeta kinsa mihinay’g duol kang Goding. (Kataposan)