Ambisyosa

Gula 14

Taud-taud ang pagtinutokay nila ni Lito ug Marit. Wala sila’y kasayuran nga may mga mata nga nagpaniid lang kanila. Didto ra sa unahan ang amahan ni Marit naglantaw.

“Kun adunay manguyab kanimo nga dili sama ninyo og kahimtang Marit, may kahigayonan kaha nga sugton nimo siya?” pangutana ni Lito sa dalaga nga ingon sa nagpalabtik.

Abtik kaayo nga nakapasabot si Marit nga dili ang kahimtang sa usa ka tawo maoy iyang tan-awon sa gusto niya nga ikarelasyon, kun dili, ang   iyang kamatinud-anon.

Wala’y pulong nga migawas gikan sa baba ni Lito. Igo lang siya nga mitutok kang Marit. Apan taud-taud, wala na kapugngi sa ulitawo ang iyang kaugalingon.

“Ang tinuod, Marit, I feel in love with you. Apan nagpanagana ko tungod kay dili managsama ang atong kahimtang,” matud ni Lito nga migunit sa wala nga kamot ni Marit.

Nakita ni Lito nga mipahiyom si Marit. “Bitaw, dili man maayo nga magpakaaron-ingnon. Nakagusto ‘sab ko nimo Lit ug gani akong gitug-anan si Papa niini kay wala g’yud ko’y gilimod kaniya,” matud ni Marit.

“Salamat kaayo Marit. Isaad nako nga dili gayud ako magbudhi kanimo. Dili ko ikaw hatagan og kaguol sa pagdawat mo sa akong gugma,” ni Lito nga wala makapugong sa pagbuhi og matam-is nga pahiyom.

Milabay ang mga adlaw, semana ug mga buwan. Gipakasal sila si Lito ug Marit sa amahan sa dalaga. Lunlon kalipay ang ilang panag-uban. Bugtong anak si Marit ug patay na ang iyang inahan mao nga si Lito ang gisaligan pag-ayo pagdumala sa negosyo. (Sumpayan)