Domingo kadto ug wa’y klase. Gipakuyog ko ni kuya Cain, nga akong maguwang, sa among umahan. Naatol man gud kadto nga dili maayo ang pamatyag sa lawas ni tatay Barlo.
Mamupo si kuya Cain sa bunga sa tinanom nila ni tatay Barlo ug nanay Ludy nga mga kalbasa, batong ug paliya aron itumod sa lungsod inigkaugma. Kinahanglan nga may makaabag kang kuya Cain mao nga gikuyogan ko siya.
Duha ra kami ka managsuon. Nagtungha pa lang ako sa ikaupat nga ang-ang sa hayiskol sa among dapit sa Paraiso, San Jose, Mabini.
Mogradwar na ako karong umaabot nga Marso. Human unya sa akong paggradwar sa hayiskol, ang desisyon lang sa akong mga ginikanan maoy akong agdon kun makapadayon pa ba ako sa pagtungha sa college.
Nagtuo man gud ko nga sama ni kuya Cain, igo ra ‘sab ko nga makatapos sa hayiskol sanglit wala may ikasugakod paggasto ang akong mga ginikanan kun moeskuyla ko sa college.
Kabus lang ang akong mga ginikanan. Mao ra’y gisaligan ang panguma. Ang halin sa abot nila nga lainlaing matang sa utanon maoy bugtong gisaligan sa akong pagtungha sa hayiskol. (Sumpayan)