NPA sa bag-ong kinabuhi

Estudyante si Dante sa usa ka kolehiyo nga gidumala sa mga Pari sa usa ka dakbayan sa amihanang Mindanao. Usa siya sa mga aktibista niini nga eskuwelahan. Daghan ang nakaila kaniya ilabi na sa kapolisan. Kun adunay mga estudyante nga mag-rally, dili mahimo nga dili siya kauban.

Sa laktod nga pagkasulti, black listed siya sa ilang Dean of College. Kun hisgotan ang iyang grado, wala’y problema kay kanunay nga tag-as ang iyang grado bisan sa unsa nga subject, busa, wala’y bisan usa sa iyang mga magtutudlo nga nagplano nga siya bagsakon.

Sukad pa niadtong nagtungha pa si Dante sa elementarya ug hangtud na sa high school, balidiktoryan siya. Dinhi lang siya nayabag sa kolehiyo, tungod sa pagtulon-ang komunismo.

“Abi ninyo mga Bay, maayo ang komunista kay ang tawo pareho, wala’y pobre ug wala’y sapian. Busa, atong suportahan ang kalihokang komunismo,” pulong ni Dante uban sa daghang tinun-an sa unibersidad.

“Ibagsak ang demokrasya. Ibagsak ang mga Kano dinhi sa atong nasud!”

Tungod sa iyang pagka aktibista, nalambigit si Dante sa lain-laing krimen hangtud nga misangko siya sa bilanggoan, tungod sa mga krimen nga iyang nabuhat.

Dinhi na mitagam si Dante diha nga nabartolina siya tungod sa iyang pagsumbag sa warden sa bilanggoan.

Samtang siya naa sa sulod sa bilanggoan, iyang gipaminaw ang pagtulon-an ubos sa demokrasya ug komunismo. Gintandi niya kun asa sa duha ang maayo. Sa kadugayan, nakita niya nga maayo gayud diay ang demokrasya.

Natapos ang iyang sentensiya sa bilanggoan hangtud nga nakagawas na si Dante. Sa iyang paggawas, nakita niya ang dakong kausaban sa iyang kinabuhi.

Kaniadto, makig-away siya sa mga Amerikano apan karon sa iyang paggawas, nakita niya nga maayo diay ang mga Kano kun itandi niadtong mga tawo nga responsable pagkoloniya sa mga Filipino.

Sama si Dante sa ubang mga aktibista nga nag-usab. Dunay mga kalihokan sa gobiyerno mahitungod sa rebelde, si Dante dayon ang motabang pagpasabot sa mga tawo nga nahisalaag.

Unya iya dayong sultihan ang naminaw sa iyang pakigpulong nga kuno siya usa kaniadto ka sakop sa NPA sa bag-ong kinabuhi. (Kataposan)