Ambisyosa

Nakita ni Lito nga misakay si Grace sa nindot kaayo nga kotse nga nagparada atubangan sa department store nga gitrabahoan sa dalaga.

Abtik nga gipahunong ni Lito ang iyang awto. Nanaog siya aron duolon ang naghunong nga awto nga gisakyan ni Grace, apan diha nga tuktokon na unta ni Lito ang bildo sa kotse, kalit lang kini nga misirit.

Mura’g nahisama si Lito sa kandila nga giugbok samtang naglantaw sa kotse nga gisakyan ni Grace nga nagkalayo sa iyang panan-aw.

Nagdali si Lito nga misakay pagbalik sa iyang kotse aron gukdon ang kotse nga gisakyan sa iyang girlfriend, apan wala na niya kini makita pa.

Gikontak ni Lito ang numero sa cellphone ni Grace, apan dili makontak. Wala makasabot si Lito sa iyang gibati. Naglibog siya ngano nga si Grace misakay niadtong kotse.

Mihunong si Lito atubangan sa usa ka fast food restaurant aron mopalit siya’g makaon, apan wala dayon siya manaog sa iyang awto. Kalit nga nahinumdom sa gisulti ni Grace kaniya usa ka higayon niana.

Gitug-anan siya ni Grace nga adunay lalaki nga mura’g adunahan ang panapot nga nakighigala kaniya didto sa gitrabahoan niya nga department store. Wala lang kadto hatagi og pagtagad ni Lito ang gisulti kaniya ni Grace.

Karon misantop sa huna-huna ni Lito nga posible nga mao kadto ang sakay sa nindot kaayong kotse nga gisakyan ni Grace. Kahilakon si Lito nga nakapanglantaw sa unahan.

Hinay-hinay na nga nagtuo si Lito nga giilisan na siya ni Grace. Nagsugod nga nausab ang tinagdan ni Grace kaniya diha nga wala niya pahulama og P50 mil nga alang kuno sa iyang mga ginikanan. (Sumpayan)