Naamiga sa FB

Gula 7

Gihatud g’yud ni Ramon si Kenn didto sa gipuy-an niini sa Barangay Guadalupe. Kadto maoy sinugdanan nga mag-adtoan na si Ramon sa gipuy-an sa dalaga.

Usa ka adlaw, gibati og dili tiaw nga kabalaka si Ramon tungod kay wala g’yuy mga posts sa Facebook si Kenn. Wala g’yud usab kini mo-reply sa iyang mga text messages. Gitawgan ni Ramon sa iyang numero apan dili makontak.

Nabalisa na kaayo si Ramon mao nga nianang pagka hapon human sa iyang trabaho, midalikyat gayud siya pag-adto sa gipuy-an sa dalaga. Wala dayon moderitso si Ramon sa gipuy-an ni Kenn. Didto usa siya sa atbang nga tindahan ug nagpasumangil nga mipalit og softdrinks ug usa ka putos nga biscuits. Didto ra ang iyang mga mata sa atbang apan mura’g mingaw ang balay.

Nakahuna-huna si Ramon nga pakigsultihan ang babaye nga nagbantay sa tindahan. Iya kini nga panagaton og estorya kay basin og may nahibaw-an kini ngano nga wala na motubag si Kenn sa iyang mga text messages.

“Kanang mga babaye nga nagpuyo sa atbang mamalit ba kana sila dinhi sa imong tindahan?” pasiuna ni Ramon. “Aw O, suki nako na sila, ilabi na og gabii kay mopalit man g’yud na sila og softdrinks sa dayong katulog,” matud sa tindera.

Igo lang miyango si Ramon ug naglantaw gihapon sa atbang. “May kaila ka sa mga nagpuyo diha?” pangutana sa tindera. “Amiga nako si Kenn,” mubo nga tubag ni Ramon.

Mipahiyom ang tindera. “Aw naa man diha si Kenn. Gihilantan ra ba kay gipalitan gani siya og tambal sa iyang kauban sa trabaho ganina.”  Nakurat si Ramon sa iyang nasayran. (Sumpayan)