Naamiga sa FB

Nakita ni Ramon nga adunay babaye nga mibuwag sa grupo ug milakaw paingon sa ganghaan sa beach resort. Nakasiguro na siya nga ang babaye mao si Kenn. Nagbitbit kini sa iyang cellphone.

Bisan og wala kaayo mabantang kang Ramon ang panagway sa babaye apan nasiguro niya nga maanyag kini tungod sa iyang bayhon ug sa panglawas.

Nindot kaayo ang pamorma niini sa iyang mga paa, hawak ug angayan kaayo nga nag-short pants ug sa iyang buhok nga wala masudlay kay klaro kini nga gikan pa nga naligo.

Gisunod kini ni Ramon paingon sa gate sa beach resort. Iyang nakita nga naglingi-lingi si Kenn nga klaro kaayo nga may gipangita. Mihinay’g duol si Ramon sa dalaga.

“Hi, ikaw ba si Kenn?” matud ni Ramon nga nagpahiyom ngadto sa dalaga. “Ikaw ba ‘sab si Ramon?” bawos-pangutana ni Kenn. Naghangpanay sila pinaagi sa paglamanohay.

“Tana, adto ta sa among cottage Mon. Naghuwat na kanimo ang akong mga friends kay nahibawo man sila nga moapas ka,” matud ni Kenn nga miuna sa paglakaw paingon sa ilang grupo.

Nagngisi ang mga barkada ni Kenn nga nagtan-aw kang Ramon. Gipaila-ila si Ramon ni Kenn ngadto sa iyang mga barkada. Gikulbaan si Ramon kay basin og kauban ni Kenn ang iyang boyfriend ug masuko kini kaniya.

Karon pa makahuna-huna si Ramon nga nakalimot diay siya sa pagpangutana kang Kenn kun uban ba kaniya sa pag-beach outing ang iyang boyfriend. (Sumpayan)