Pintok ang order sa PNP provincial commander nga ipasulbad g’yud sa kapolisan sa lungsod sa Tinago ang mga pagpamatay nga mibiktima og mga bata nga natawo sa Septiyembre 8.
“Buhata g’yud kutob sa imong mahimo nga masulbad kining krimen karon dinhi sa ato, Nicko. Kun dili kini masulbad sulod sa 20 ka adlaw, mapugos na gayud ako sa pagrelibo kanimo tungod kay mao kana ang mando sa atong provincial director,” matud ni Chief Inspector Dindo Raval.
Huyhoy ang mga abaga ni SPO1 Nicko Bernal nga migawas sa buhatan sa hepe. Igo lang siyang nakasulod sa iyang opisina, mibagting ang iyang cellphone. Ang numero nga 6666 ang narehistro sa caller ID sa cellphone. Gidali kini pagtubag ni Nicko.
“Ngano nga nanawag ka?” matud ni Nicko.
“May importante lang ko nga ipahibalo kanimo. Nasayod na kami nga ang imong anak natawo sa Septiyembre 8. Siya na ang sunod namo nga target. Busa buhata g’yud ang tanan aron kapanalipdan mo ang imong anak,” matud sa babaye nga nanawag.
Sa nadungog ni Nicko, kalit lang siya nga gikulbaan.
Makigsulti pa unta si Nicko sa misteryoso nga babaye nga nagpaila nga pangulo sa Bangkulis Black Brotherhood apan nabati niya nga gi-off na ang cellphone. Nakapanghupaw si Nicko. (Sumpayan)