Anastacio mangtas

Noy Tasyo, adunay nangita nimo, mura’g mga armado man to sila!” pahibawo ni Diwit, anak sa iyang silingan.

Dili man gud taga dinhi si Anastacio sa Sityo Dagami ug matud pa sa silingan niini nga sila si Tikoy-Lilang nga si Tasyo gipangita didto sa isla Balod-Lubog kay nakapatay og tawo.

“May nangita nako, Diwit? Ako g’yud kaha ang gipangita adto nila?” suna ni Tasyo.

“O, Noy Tasyo, kay niingon man sila nako, Dong, kaila kang Tasyo? Ug ako sab nga gitubag nga Oo, silingan man na namo ug akong gitudlo ang imong payag, Noy Tasyo,” matud sa bayongbayong.

Mikunot ang agtang ni Tasyo. Gibuga ang kusog nga panghupaw. Tuod, wala pa gani makalakaw si Tasyo aron mopauli na sa iyang payag, may misangpit kaniya. Sa iyang paglingi, nakita ni Tasyo ang duha ka tawo nga nagtion na sa ilang pistola kaniya.

“Mga polis mi, nia mi aron pagdakop nimo sa sala nga pagpatay! Imong gipatay ang usa ka dalaga didto sa isla Balod-Lubog,” matud sa usa ka polis.

“Busa, kuyog kanamo karon dayon kay kun magpagahigahi ka, mapugos mi pagdala nimo ug mabun-og ka lang unya,” matud sa polis.

“Dili ako ang nagpatay kang Lucrecia kon dili si Toribio, ang manlulugos didto sa isla. Ako g’yud mismo ang nakakita sa maong krimen. Kun inyo ko nga hatagan og higayon, dad-on nako dinhi sa inyong atubangan si Toribio aron pabayron sa sala nga iyang nabuhat,” ni Tasyo pa.

Kalit nga gidasmagan ni Tasyo ang duha ka polis ug gidala niya sa payag. Didto iyang gigapos ang duha ug nagdali nga milakaw si Tasyo.

Gabii na nga nahibalik si Tasyo. Mitugpa lang kini sa tugkaran sa payag ug dala na niya si Toribio. Nagkurog si Toribio sa kahadlok ug adunay mga garasgaras ang iyang nawong.

Gibuhian ni Tasyo ang duha ka polis, gibadbaran sa ilang mga gapos.

“Sir, ako ang tinuod nga kriminal ug dili si Tasyo, gilugos nako si Lucrecia ug pagkahuman akong gipatay aron dili makatug-an sa mga awtoridad. Apan, diha diay si Tasyo nga nakakita sa akong gibuhat, ug nakuha niya ang akong panyo nga nahabilin didto sa nahitaboan,” nagkulismaot ang nawong ni Toribio.

“Tasyo, bisan og miangkon na ang tinuod nga kriminal, ikuyog ka gihapon namo sa presinto kay kuhaan ka namo’g statement,” sa usa ka polis. Miyango si Tasyo. (Kataposan)