Gula 74
Nagmaigmat ang mga polis kay misiga ang suga sa sulod sa balay sa maestra nga ilang gipanid-an. Namasin sila nga mogawas si Mrs. Tommi aron ila kini nga masundan.
Apan wala g’yud mogawas si Mrs. Tommi niadtong gabhiona. “Dili g’yud tingali si Mrs. Tommi ang pangulo sa mga Bangkulisan,” giingnan ni SPO1 Nicko Bernal si PO3 Roy Cañares sa ila na nga pagpamauli.
“Lugwayan pa nato ang atong pagpaniid, sir. Tingali’g naatol lang nga wala’y operation ang kulto karon,” matud ni Roy.
Sa misunod pa nga gabii, gipanid-an gihapon nila si Mrs. Tommi. Alas 10:30 sa gabii nakita sa mga polis migawas ang maestra sa iyang gipuy-an.
Hilom kining gisundan nila ni Nicko. Nag-anam na’g ka dako karon ang pagduda sa kapolisan nga si Mrs. Tommi may kalabotan gayud sa kulto.
Mainampingon nilang gisundan si Mrs. Tommi nga naglakaw subay sa karsada. Wala lang sila magpaduol pag-ayo niini aron dili sila mamatikdan.
Pag-abot sa simangan, kalit lang nahanaw si Mrs. Tommi. Wala na kini masundi sa ilang panan-aw. Wala sila makabantay kun diin kini motipas sa pag-agi.
Igo na lang nakapangalot si Roy sa iyang ulo. “Anugon, higayon na unta nga mamatud-an nato kun siya ba gayod ang pangulo sa kulto,” ni PO3 Cañares. (Sumpayan)