Nibuhi si Dory og halawom nga panghupaw paglingkod niya sa sopa sulod sa condo nga bag-o niyang gibalhinan. Ni’ng sayo nga kahaponon, nakahinuktok siya nga mitan-aw sa upat ka bungbong sa mahalon nga condo unit.
Pagsumbong niya ni William nga buntis na siya, gipabiya siya sa trabaho ug gidala niini’ng condo nga pinili ni William.
“O, ngano nga mura man ka’g wa malipay niini’ng nindot nimo nga pinuy-anan?” ni William nga nitupad ni Dory. Nahatutok si Dory sa iyang hinigugma.
Promo girl si Dory og cosmetics products sa usa ka dako’ng mall sa dakbayan. Atol kadto nga bag-o lang siya nga gibuwagan ni Danny kay na-corner og laing babaye diha nga miabot sa iyang kinabuhi si William.
Magul-anon si Dory usa ka hapon nga nagbarug tungod sa showcase sa mga cosmetics. “Mura ma’g lonely ka, miss. Niay kuwarta, pangtaksi nimo. Gi-invite tika’g dinner sa Club Ultima. Maghuwat ko nimo didto karong alas siyete sa gabii. Adto na lang ta didto mag-ila-ila,” matud sa ambongang lalaki nga mitunol og baga nga sobre.
Wa sa hunahuna ni Dory nga gidawat niya ang tambok nga sobre. Nibiya ang lalaki. Pag-abli niya sa sobre, bayente mil pesos ang sulod. Pangtaksi lang. Wa siya kabalibad. Human sa dinner, ni-tsek-in sila og mahalon nga hotel. Didto nasayran ni Dory nga dugay na diay siya nga gimata-mata ni William.
Usa ka tuig ang ilang relasyon. Buhong si Dory sa salapi. P200 mil matag bulan ang allowance niya gikan ni William.
“Minyo ko, pero ang akong asawa dili selosa kay buhong man ‘sab siya sa iyang mga kapritso,” giingnan ni William si Dory sa usa nila ka date.
Kay dili gastador si Dory, nakatabang siya sa iyang mga ginikanan ug mga igsoon. Kontento siya ni William nga usa ka adunahang negosyante.
“Hangtud sa hangtud, kabit lang g’yud ko nimo?” ni Dory.
“Kabit na kun kabit. Pero ang imong gisabak atong anak. Makapanunod sa akong katigayonan. Ug samtang buhi pa ko, magdawat ka sa binulan nimo nga allowance,” ni William.
“Salamat Wil. Salamat,” ni Dory. Nigakos siya ni William. Gihagkan usab ni William.
“Wa man tika higpiti. Makahugoyhugoy man gihapon ka sa imong mga paryente ug mga higala,” dugang ni William. Hilom si Dory nga nagpasalamat sa iyang suwerte. Sa pagkakaron, wa g’yuy kabalak-an si Dory. Pinangga kaayo siya ni William.
Apan naglaraw siya nga dili niya iwaldas ang iyang allowance. Kay magamit ra unya kini niya kun mausab na ang huyop sa hangin. (Kataposan)