May gitago ang kangitngit

Pagkilab sa pipila ka daklit, mitingog ang intercom sulod sa iyang buhatan. Iya kining gitubag. Si Chief Inspector Dindo Raval diay ang nanawag.

“Ari sa akong opisina kay may mahinungdanon kita nga panagsultihan. Karon g’yud dayon, Nicko,” matud sa hepe.

Miadto gilayon si Nicko sa opisina sa hepe. “Bag-ohay pa  nga nanawag nako si Supt. Sancho Ebero, ang atong provincial police director,” nagkanayon ang hepe.

“Naalarma na siya pag-ayo sa nahitabong pagpamatay sa mga bata dinhi sa lungsod sa Tinago. Gi-pressure ko sa atong provincial director.”

“Lumad nga taga Tinago ang atong provincial director, Nicko,” matud na usab sa hepe. “Dili siya gustong molaksot ang imahen niining lungsora gumikan sa padayong pagpamatay sa mga batang babaye nga binuhatan sa mga Bangkulisan.”

“Nag-irog na ang akong imbestigasyon, Sir,” matud ni Nicko. “Nagtuo ko nga sa dili madugay masulbad na nako kining kasoha.”

“Paningkamoti gayud, Nicko,” sa hepe pa. “Kay kun mapakyas kita sa pagsulbad niining kasoha, hayan marelibohan kitang tanan.”

“U-unsa?” nakalitan si Nicko.

“Mao kana ang gipasidaan ni Supt. Ebero kanako mao nga buhata gayod ang tanan aron masulbad sa labing daling panahon kining kaso nga atong giatubang karon,” ni Chief Inspector Raval. (Sumpayan)