May gitago ang kangitngit

Gula 64

Nahunahuna ni SPO1 Nicko Bernal nga ang subsob nga pagpamatay sa mga bata’ng babaye makadaot sa imahe sa lungsod sa Tinago ug wala nay moduaw nga mga  turista.

Nabalaka si Nicko nga kun dili masulbad sa labing dali nga panahon ang pagpatay sa mga batang babaye sa Tinago, mahimo kining hulga sa seguridad sa kabataan.

Samtang naghunahuna si Nicko og paagi unsaon pagsulbad ang maong mga krimen, mitingog ang incoming call alert sa iyang cellphone.

Gidali niya kini pagkuha ug gitamdan ang screen. Ang numero nga 6666 na usab ang nanawag kaniya. Iya kini nga gidali pagtubag.

“Hello,” matud ni Nicko. Nabati niya ang katawa sa usa ka babaye didto sa pikas tumoy sa linya. Ingon sa gipalagot si Nicko sa maong katawa.

Mitingkag ang dalunggan sa polis sa pagkadungog niya sa katawa sa babaye nga mitawag kaniya pinaagi sa cellphone.

Naglagot si Nicko nga namati sa bahakhak sa babaye nga daw nagdala og kantalita.

“Ngano nga nanawag ka?” nangutana si Nicko nga naglagot na kaayo.

“Sorry kun nakadisturbo ko nimo. Gusto lang ko nga mamati sa imong tingog,” sa babaye pa.

“Kinsa ka ba gayud? Ug ngano nga dili ka man magpaila sa imong kaugalingon? Pagsulti kun kinsa ka?” matud ni Nicko. – Sumpayan