Disbarment

Sa pagtambong ni Atty. Danny Ijucot sa husgado karong buntaga, andam na siya sa pagtayada aron ma-dismiss ang kaso sa iyang kliyente nga si Simeon Baquig.

Gikiha si Simeon og kaso nga Partition sa iyang bayaw, nga si Arlene, biyuda sa manghod ni Simeon, nga si Roger.

Makigbahin si Arlene sa mga kabtangan sa ginikanan ni Simeon isip asawa o heredero ni Roger.

Sa eskedyul sa bista karong buntaga, tulo ka bulan na ang huwes nga si Judge Mario Epid, nga nipalusot og Order nga kinahanglan ang mga documentary evidence ni Arlene, nga isumiter na sa husgado.

Wala katuman si Atty. Nilo Taquig sa mando sa huwes. Kun dili kasumiter og ebidensiya ang kihante, isipon sa husgado nga wala siya’y ebidensiya. Ug puwede nga ibasura ang iyang kaso.

Pagtawag sa kaso, nitindog dayon si Danny. “Good morning, Your Honor. Respectfully appearing for the defendant,” ug giliraw niya iyang mga mata libut sa husgado.

Wa niya makita si Nilo ug iyang kliyente. “Kindly approach the bench, Atty. Ijucot,” sa huwes. Niduol si Danny sa huwes nga mura’g naglingkod sa trono.

“Nasuspenso si Atty. Taquig. Ato lang usa nga i-reset ang hearing. Hatagan nato og chance si Atty. Taquig nga ini’g kahuman sa iyang suspension, mo-offer siya sa ebidensiya. Kun dili, anha pa nako i-dismiss ang kaso,” matud sa huwes. Niyango si Danny.

Sa gawas sa husgado, gihangyo ni Danny si Simeon nga mag-research sa Internet. Susihon kun unsa’y kaso ni Nilo nga nasuspenso man.

Pagkahapon, nitawag dayon sa selpon si Simeon ngadtong Danny.

“Attorney, gikiha diay og disbarment si Atty. Taquig sa iya ra mismo nga kliyente. Nilutaw nga giilad niya ang iyang kliyente.

Matud sa Commission on Bar Discipline, taktakon g’yud siya sa pagka abogado. Apan giusab sa Supreme Court ang hukom sa Commission.

Gihimo lang suspension bali’g unom ka bulan. Kaniadto pa’ng 1990 ang kaso nga disbarment. Unya karon pa hukmi human sa 26 ka tuig,” ni Simeon.

“Mao ba?” Mao diay nga daghan g’yud nga abogado ug huwes nga abusado kay dugay man kaayo ang kastigo kun sila makasala.

Gawas nga dugay, ipaubos pa ang kastigo” ni Simeon.

 “No comment lang ko ana. Imo ra na” ni Danny. Nakapanglingo nga nagpindot sa iyang selpon. (Kataposan)