Lo, nganong karon pa man ka nahilig og kaon og avocado?” ni Fiona, 10 anyos nga apo ni Atty. Peter Onyas. Nag-atubang og kaon og avocado shake ang lolo ug apo sa lamesa, sulod sa lawak kan-anan sa balay sa apohan.
Bisita karong udtoha si Fiona ug iyang mga ginikanan nga sila si Jimmy ug Sonia (anak ni Peter.) Hapit kada-Domingo anha maniudto si Fiona ug mga ginikanan sa balay sa iyang lolo Peter kay mingawon ang apohan nila. Bag-o man lang namalhin og puyo si Fiona ug mga ginikanan ngadto sa silingang baryo.
Sukad pagkatawo ni Fiona hangtud pag-edad og nuybe, diha sila puyo sa balay sa iyang lolo. Labi pang mingawon nila iyang lola Nena nga maoy ilang kusinera.
“Kaniadto sa batan-on pa ko, pag-review nako para bar exams, nikaon gyud ko’g avocado kada adlaw. Apan, karon, nihilig ko kay maayo gyud og nutrition value ang avocado. Akong gipa-research sa internet ni mama nimo. Dunay vitamins B, C ug E ang avocado. Maka-stabilize sa blood sugar sa dunay dayabites,” ni Peter. Malumong nipasabot sa apo. (Ang mga bata karong panahona, inquisitive na kaayo. Daghang mga pangutana.)
“Kaniadto sa nagkuha pa ka og bar exams, unsa ra may tumong nimo nga nikaon ka’g avocado?” ni Fiona. “Wa gyud ko’y kalibutan kun unsay sustansiya sa avocado adtong panahona. Nasayud lang ko nga prutas na ug dunay sustansiya. Pero ang labing dakong hinungdan nga nikaon og avocado, mao nga ang pulong “avocado” duol ra sa “abogado”. Nikaon ko’g avocado aron maabogado. Gihimo nakong pongsoy,” ni Peter. “Ha ha ha ha ha. Grabe ni Lolo. Nitoo sa pongsoy,” ni Fiona. Hapit nasud-ipan sa pagkinatawa.
“Nisalir man ang pongsoy. Kay naabogado man gyud ko. Nipasar man sa bar,” ni Peter. Nagpahiyom. “Pagkatinood, lo, ang vitamin B sa avocado, memory enhancer,” ni Fiona. (Ang mga bata karon, suheto na sa Internet) “Sa ato pa, wa gyud ko nasayop nga nikaon ko’g avocado sa pag-bar nako, bisa’g wa ko nasayod sa sustansiya. Kay ang akong tuyo mailisan lang ang letrang “c” sa letrang “g”, ni Peter. “Wa gyud, lo. Epektibo imong pongsoy. Ha ha ha ha ha,” ni Fiona.
Ug nag-apir ang apohan ug apo. Nalingaw og tan-aw nila ang lola ug mga ginikanan ni Fiona nga nakigkulukabildo sa iyang lolo nga mora’g tahor na. (Kataposan)