Ingon sa mitabang kang Kenn ug Lyn ang panahon tungod kay pinaagi sa kalit nga brown out nakahigayon sila pagpadayag sa tagsa-tagsa nila ka mga pagbati.
Wala diay damha ni Kenn nga ang dalaga nga siyudadnon may gitagoan usab diay nga gusto kaniya.
“Basin og makaingon ka nga sayon ra kaayo ko nga pagka babaye kay misugot dayon kanimo sa unang adlaw sa atong panagkita,” matud ni Lyn.
“Ayaw na kana paghuna-hunaa Lyn, dili ba tinuod man kaha ang giingon nga love at first sight? Magpasalamat lang ko nga ang akong pagbati gitugbawan nimo og susama nga pagmahal,” ni Kenn nga mihawok pag-usab kang Lyn.
Usban na usab unta paghawok ni Kenn ang dalaga diha sa iyang lips, apan nadungog nila ang tawag sa iyang mga kauban nga sila si Alice ug Clemen uban kang Nympha nga maguwang babaye ni Kenn.
Nanindog sila si Kenn ug Lyn sa ilang gilingkoran ug gisugat ang tulo ka babaye. “Dia ra mi uy, naglantaw ra mi sa mga nanagsayaw kay saba kaayo didto sa baylehan,” matud ni Lyn.
Mikagiki og katawa si Clemen nga nakasabot nga mura’g nagkasabot na ang mga pagbati nila ni Lyn ug Kenn. Wala na g’yud mobalik ang kuryente. “Ugma sa buntag, nagkasabot mi nga mangaligo ta sa dagat,’ giingnan ni Nympha si Lyn.
Bisan og nag-atubang na ang upat, apan wala sila makabantay nga ang wala nga kamot ni Lyn gigunitan ni Kenn ug gipasalipdan lang sa lawas sa dalaga. (Sumpayan)