May gitago ang kangitngit

Nagpakisayod ang mga miresponde nga polis ngadto ni SPO1 Nicko Bernal kun unsay nahitabo.

“Girakrakan ang akong balay sa wala mailhi nga mga tawo. Apan dali ra usab kaayo sila nga misibat,” giingnan ni Nicko si PO1 Efren Bagcat ug kaubanan.

“Wala bay nasamdan sa mga sakop sa imong pamilya sir?” matud sa laing polis.

“Kaluoy sa Dios, wala’y naunsa sa akong asawa ug anak. Balik na lang kamo sa police station, ako na ang bahala dinhi,” matud ni Nicko.

Tuod, namiya ang mga polis.

Lawom na ang gabii. Ang asawa ug anak ni Nicko nahinanok na pag-ayo, apan siya nagpabilin nga nagmata. Nagpaniid si Nicko sa palibot.

Nabalaka siya nga tingali’g mobalik kadtong mga armado’ng tawo nga mipaulan og mga bala sa ilang balay.

Lapas na sa tungang gabii. Mibati na’g pagduka si Nicko. Sanglit wala may timailhan nga mobalik ang mga armado’ng tawo, nakahukom siya nga matulog na lang.

Apan sa wala pa siya mosulod sa lawak nila ni Gelli, iya una nga gisuhid ang gawas sa balay kun wala bay nagpahipi nga mga anino sa palibot.

Wala usab niya palunga ang suga sa tugkaran sa balay. (Sumpayan)