Nakigbalik sa kapuyo

Dear Tita Salie,

Ako si Lynn, 22, single mom. Bahin sa amahan sa akong anak kining problema nako.

Diha nga three months na ang akong tiyan nagbuwag mi kay wa siya’y klaro, magsige lang og laag, ug wa’y trabaho. Mipauli ko sa balay sa akong ginikanan.

Apan after 3 years, nagkakontakay mi’g balik sa akong kapuyo pinaagi sa Facebook. Nangayo siya’g pasaylo kanako ug gipasaylo ko ra ‘sab siya ug nagkabalik mi. Nabalaka ko Tita Salie kay basin masuko ang akong mga ginikanan. Palihug pasabta kun unsa ang akong buhaton.

* * *

Hello Lynn,

Pagkamubo sa kalipay nga imong natagamtaman ug naputol kini sa wa’y klaro nga hinungdan.

Hinuon, gisumpay ra usab ninyo pagbalik. Ang pagka magtiayon nagkinahanglan gayud og lig-ong pundasyon aron nga kun adunay bisan unsa nga pagsulay dili kini dali nga mabungkag.

Kun iapil ninyo ang Diyos sa inyong relasyon dili kini dali nga mabungkag. Lynn, husto ka na og edad ug may katungod ka na sa pagpili kun unsay imong kaugmaon ug anaa na kanimo ang paghimo og desisyon.

Ayaw kahadlok sa imong mga ginikanan, hinuon, sultihi sila sa malumo nga paagi ug pagbaton og pailob. - Tita Salie