Gula 3
Nalingaw kaayo ang tulo ka dalaga nga bisita nila ni Kenn nga nakakita sa tinubdan nga kuhaanan og tubig-mainom sa taga Barangay Tinubdan. Ang tinubdan anaa mahimutang sulod sa usa ka langob nga giumbawan sa nagyungyong nga kakahoyan.
Pagsulod nila sa langob aron mokuha’g tubig gikan sa tinubdan, hilom kaayo ang tulo ka babaye kay gipasidan-an man sila ni Kenn nga dili maghimo’g kasaba kay basin og sabaan ang mga engkanto nga anaa nagpuyo sa langob.
Hilom nga gikahinangop ni Kenn ang mao nga sitwasyon tungod kay sa kahadlok sa tulo ka babaye sa talan-awon nga anaa sa ilang palibot pareho sila nga migunit sa bukton sa batan-ong ulitawo.
Si Lyn nga maoy naibgan g’yud ni Kenn diha mikabyon sa tuo nga bukton sa ulitawo samtang sila si Alice ug Clemen didto usab migunit sa pikas. Misamot pagkahugot ang paggunit ni Lyn sa bukton ni Kenn diha nga nakita niya nga adunay mga kuwaknit nga nanglupad.
“Ayaw lang mo pagkahadlok kay dili man manghilabot ang mga kuwaknit,” giingnan ni Kenn ang mga dalaga. Mibahakhak og pangatawa ang mga dalaga diha nga nakagawas na sila sa langob nga nahimutangan sa tinubdan.
“Sukad karon pa g’yud ko makasulod og langob Kenn,” matud ni Lyn nga wala na mogunit sa bukton sa batan-ong ulitawo. Unya, takulahaw lang nga nadungog nila ang lanog nga tugtog sa musika.
Naniyagit ang mga dalaga. Sila si Alice ug Clemen wala makapugong sa pagsayaw-sayaw sa kalipay. Nagpahiyom lang nga nagtan-aw kanila si Lyn. “Duol ra diay dinhi ang sayawan Kenn?” matud ni Lyn. (Sumpayan)