Pista sa bukid - Gula 2
Bisan og bag-o pa lang gani nga gikahimamat ni Kenn ang babaye nga bisita sa iyang maguwang, apan mura’g mikaringking dayon ang batan-on niya nga kasing-kasing.
Sanglit may pagka kumedyante man si Kenn, dali ra kaayo niya nga nasuod ang tulo ka babaye nga bisita ni manang Nympha niya. “Alegre diay dinhi sa inyo kun magpista Kenn?” matud sa babaye nga tambokon.
“Alegre g’yud kay dinhi sa among baryo, nagpabilin pa man ang kinaraan nga sayaw nga maggakus ang babaye’g lalaki,” matud ni Kenn nga milingi sa iyang mga kuyog.
“Uy, nagsige na ta og estorya pero wala ka pa makaila namo Kenn,” matud sa tambokon. “Kini siya mao si Alice, kini ‘sab mao si Lyn ug ako mao si Clemen.”
Gipasiklapan ni Kenn si Lyn, ang babaye nga maoy iyang naibgan. Abtik kaayo nga nakabantay sila si Alice ug Clemen sa tinan-awan ni Kenn ngadto sa ilang kauban.
Mihugyaw ang duha ka dalaga ug gisungog nila ang kauban nga si Lyn. “Kuyaw og mahalin ni si Lyn da kay nakursonadahan man dayon sa manghod ni Nympha,” matud ni Clemen.
Nakapahiyom og hilaw si Kenn kay wala siya magtuo nga makabantay ang mga babaye nga may pagtan-aw siya kang Lyn. Namatikdan ni Kenn nga magsige na usab og pasiklap si Lyn kaniya.
Unya, miabot na sila sa tinubdan nga kuhaanan og tubig mainom sa mga lumolupyo sa barangay. “Kanindot diay dinhi no? Walay pagkahurot ang inyong tubig Kenn?” matud ni Lyn. (Sumpayan)
- Latest
