Gula 33
Gitug-anan ni SPO1 Nicko Bernal ang mga ginikanan sa gipatay’ng bata nga mga sakop sa kulto ang nagpatay sa ilang anak.
“Ang maong kulto ginganlan og Bangkulisan Black Brotherhood, usa ka pundok sa mga magtutuo nga nagsimba ni Satanas,” matud ni Nicko.
Nagpabilin sa ilang kahilom ang magtiayon nga ginikanan sa bata nga gipatay, apil ang tulo ka polis.
Ang mga ginikanan sa bata nga gipatay gipasabot ni Nicko kun ngano nga ang mga sakop sa kulto maoy iyang gitumbok nga nagpatay sa ilang anak.
Gitagsatagsa niya pagdetalye ngadto kanila ang iyang nabasa sa libro nga itom og hapin nga ilang nakaplagan duol sa ulohan sa bata nga gipatay.
“Kinsa man kaha kining mga tawhana, sir?” nakapangutana ang papa sa bata.
“Dili pa kana matubag ang maong pangutana sa pagkakaron. Apan akong ipasalig kaninyo nga dili namo lung-an hangtud nga masulbad kining kasoha,” pasalig ni Nicko.
Mapasalamaton kaayo ang mga ginikanan sa bata.
Unya, may misantop sa hunahuna ni Nicko. “Sa wala pa patya ang inyong anak, wala ba kamo makamatikod nga may tawo nga nagsige’g sunod-sunod kaniya? Wala ba kamo’y namatikdan nga may mga tawo nga kadudahan ang mga lihok?” (Sumpayan)