Si Daniel sa langub sa mga liyon

Kapin sa 2,700 ka tuig na ang milabay, nasakop sa Medo ug Persia (Medes and Persia) ang Babilonia lakip ang katawhan sa Israel. Ang hari niadtong panahona, mao si Haring Darious sa Persia.

Usa sa mga Israelihanon sa tribo ni Judah nga sakop ni Haring Darious mao si Daniel. Kini si Daniel, mainampoon sa Diyos ug kada adlaw mosulod siya sa iyang lawak aron mag-ampo.

Tungod sa iyang pagkamainampoon, gikasinahan siya sa mga sinaligan sa hari. Atol sa panagtigom sa mga sinaligan sa hari.

“Wala kita makakita og ikasumbong sa hari mahitungod kang Daniel gawas sa iyang pagkamainampoon sa iyang Diyos. Busa maghimo kita og balaod nga bisan kinsa ang mosimba o moampo sa iyang Dios sulod sa usa ka bulan gawas sa hari, itambog sa langob sa mga liyon. Ato kini nga patiman-an sa singsing sa hari aron dili mausab.”

Gitiman-an sa hari pinaagi sa iyang singsing ang maong balaod. Sa pagkasayod ni Daniel sa maong balaod, misulod siya sa iyang balay ug gibuksan ang mga bintana ug nag-ampo. Ila dayon nga gisumbong si Daniel sa hari.

“Dili ba, oh, Hari nga gitiman-an mo na sa imong singsing ang maong balaod? Karon among nakita nga si Daniel nag-ampo sa iyang Diyos nga supak sa imong balaod!”

Pagkahibalo sa hari nga si Daniel ang naigo sa balaod nga gitiman-an, nasubo kini pag-ayo sanglit si Daniel mabinantayon sa sugo sa hari. Apan wala’y nahimo ang hari kay balaod na ang gisupak. Busa ilang gitambog si Daniel sa langub sa mga liyon. Niana nga gabhiona, wala’y kinatulgan ang hari. Gisamok siya sa iyang tanlag nga ang masulondon nga si Daniel nahiagom sa silot nga iyang gitiman-an.

Busa sayo pa kaayo sa buntag, miadto na ang hari sa langub sa mga liyon. Ug didto sa baba sa langub misinggit ang hari.

“Daniel, giluwas ka ba sa Diyos nga imong giampoan?”

Mitubag si Daniel.

“Mabuhi ka sa wala’y katapusan, hari! Ang Diyos nga akong giampoan, nagpadala sa iyang anghel aron pagtak-om sa baba sa mga liyon aron dili nila ako mahilabtan.”

Gikalipay kini sa hari ug gipagawas dayon nila si Daniel gikan sa langub sa mga liyon.

Gipatawag sa hari ang tanan niya nga sinaligan nga nagbuhat sa maong balaod ug sila gipatambog niya sa langub sa mga liyon.

Diha pa lang gani sila sa baba sa langub, gikunis-kunis na sa mga liyon ang ilang kalawasan. (Kataposan)