Dear Tita Salie,
Usa ako sa mga nagsunod sa imong mga tambag. Ako diay si Alfon, 65 years old, taga Leyte. Tita Salie, tinuod ba si Satanas? or simbolo lang siya sa pagkadaotan. Angay ba g’yud kita nga mahadlok kang Satanas? Ipatin-aw palihog. Salamat sa pagtubag.
Dear Alfon,
Gipakita sa Balaang Kasulatan, ang Bibliya, nga ang linalang nga nailhang Satanas wala magbaton sa maong ngalan sa sinugdan. Hinuon kini maoy gitawag kaniya tungod sa iyang pagsupak ug pagsukol sa Diyos ug kini si Satanas tinuod gayud nga naglungtad. Siya maoy usa ka espirituhanon nga persona tungod kay sa una siya nagpakita sa langit diha sa presensiya sa Diyos. Ug ang kasulatan nagpatin-aw nga si Satanas ang nakigsulti kang Eva pinaagi sa halas nga naghaylo kang Eva sa pagsupak sa mando sa Diyos. Mao nga ang Bibliya naghatag kang Satanas og titulo nga Halas nga nagkahulogang maglilimbong, usa ka bakakon ug amahan sa bakak. Dili kita angay mahadlok kaniya kay ang Balaang Kasulatan sa Santiago 4:7 nagaingon: “Busa magpasakop kamo sa Diyos; apan sukli ang yawa ug siya mokagiw gikan kaninyo.” Labaw na kita nga makasukol karon pinaagi ni Jesus. -- Tita Salie