May gitago ang kangitngit

Gibasa ni SPO1 Nicko Bernal ang nahasulat sa libreta sa mga kulto’ng Bangkulisan.

“Sama sa nahaunang pagkatawo ni Maria, magpakatawo siya sa ikaduha nga higayon sa Septiyembre 8. Ug siya natawo na pag-usab. Wala kita masayod kun sa kang kinsang kaliwat siya nahimugso ug nagpakatawo. Busa kinahanglang patyon ang tanang bata nga natawo sa Septiyembre 8. Kun dili siya mapatay, siya ang moguba sa atong kaugmaon.”

Napahinuktok si Nicko human nabasa ang maong bahin sa libro. Maglisod siya pagtuo nga may pundok diay sa mga tawo nga ingon niini nga nagtinguha nga maoy mohari ang kangitngit ug daotan. Ang nakasalawayon pa gayud sa maong pundok kay mokutlo man sila og kinabuhi sa ilang isigkatawo.

Nahagit si Nicko sa iyang nasayran. Misamot ang iyang kasibot sa pagtaral sa hukmanan sa mga sakop sa maong grupo. Bug-os na gayud ang iyang pagtuo nga ang mga Bangkulisan maoy responsable sa pagpatay sa mga bata nga pulos natawo sa Septiyembre 8.

Takulahaw lang, samtang nagpama-landong si Nicko, diha’y kalit lang mitumaw sa iyang hunahuna. Kalit siya nga mitindog ug migawas sa iyang opisina. Iyang natukmaan sa gawas sila si PO3 Roy Canares, PO1 Rudy Alarcon ug PO1 Reuben Lebra nga nagsultihanay. (Sumpayan)