May gitago ang kangitngit

Natingala g’yud si SPO1 Nicko Bernal ug ang iyang asawa kun ngano’ng may tawo nga mura’g naniid kanila.

Wala na sila modayon pagtan-aw og salida sa TV ug nanulod na lang sila sa kuwarto aron mangatulog. Nakatulog na lang ang asawa ni Nicko ug ang ilang anak apan siya wala batia og duka.

Naniid si Nicko kun wala ba mobalik kadtong tawo nga naghupo-hupo sa luyo sa ilang kural kaganina. Lapas na sa tunga’ng gabii nga nakatulog si Nicko. Pagkabuntag, pag-abot ni Nicko sa police station, gisugat siya ni PO3 Roy Canares.

“Nangita nimo ang atong hepe, sir,” nagkanayon si Roy.

“Ngano man kuno?” sukit ni Nicko.

“Ambot lang, basta gitugon ko niya nga kun mahiabot ka na, paadtuon ka sa iyang opisina. Mura’g importante ang inyong panagsultihan,” matud ni Roy.

Aron masayran ang tuyo ni Chief Inspector Dindo Raval kaniya, miadto si Nicko sa opisina sa hepe.

Human makatuktok og katulo sa gawas sa pultahan, misulod siya. Naabtan niya ang hepe nga naghinlo sa relo niini’ng Rado. Pagkamatikod niini sa iyang pagsulod, gisul-ob og dali-dali sa hepe ang maong relo ngadto sa bukton niini.

“Gipatawag mo tuod ako, sir,” ni Nicko human makasaludo.

“Yes, Nicko,” sa hepe nga misenyas kang Nicko sa paglingkod. (Sumpayan)