Mihulma ang pahiyom sa panagway sa batan-ong polis nga si Elmer diha nga iyang nadungog nga misugot na ang maanyag nga anak sa drug pusher nga makigdeyt kini kaniya bugti sa pagtabang nga makapiyansa ang iyang amahan.
Ang tinuod, wala gayud hangyoa ni Elmer ang ilang hepe nga tabangan ang dinakpan nga amahan ni Fatima. Iya ra nga gipatuo ang dalaga aron kini mapugos sa pakigdeyt kaniya.
“Puwede na ba kita nga magdeyt karon dayon?” gisukna ni Elmer si Fatima. Mura’g nabasa ni Elmer sa panagway sa dalaga nga naglisud kini sa pagtubag, nahalingi-lingi ang dalaga.
“Basta ipasalig nga makapiyansa g’yud si papa ug dili mapriso ha?” giingnan ni Fatima si Elmer. Mitangdo si Elmer. “Unya, ang kuwarta, kanus-a man nimo ihatag? Aw sige, unya na lang inighuman nato og deyt,” matud ni Elmer. Nagkasabot sila si Elmer ug Fatima nga adto magkita sa eskena Gorordo ug Cardinal Rosales Avenue, ang karsada paingon sa Cebu Business Park human sa paniudto.
Mipauli si Fatima sa ilang balay sa Duljo-Fatima. Sigun sa gimandar sa iyang papa Victor, giadto ni Fatima ang druglord nga nagpuyo ra usab sa ilang barangay aron makakuha siya’g kuwarta nga ihatag kang Elmer.
Nadala g’yud dayon ni Fatima ang P200 mil nga gipangayo ni Elmer. Miuli si Fatima sa ilang balay. Daghang mga silingan ang nagpakisayod sa kahimtang sa iyang mga ginikanan.
Human maligo ug makailis, milakaw si Fatima kay hapit na moudto. Plano niya nga makigkita usa sa iyang mga ginikanan nga gitanggong sa polis usa siya makigdeyt kang Elmer. (Sumpayan)