Halandumon nga Sugat - Gula 5

Nasabtan ni Gerald nga gikahinangop usab ni Daisy ang iyang tanyag nga magkuyogay sila sa pagsuroy-suroy sa siyudad sa Sugbo sanglit pareho man sila nga taga probinsya ug dili suheto dinhi sa dakbayan. Sa wala pa sila magbuwag-buwag, wala gayud malimot si Gerald sa pagpangayo sa contact numbers ni Daisy. Nagpahiyom nga nagsud-ong kanila si Ruben kinsa nalupigan sa iyang ig-agaw sa kaabtik sa tsiks.

Gipasakay pa ni Gerald si Daisy sa usa ka PUJ sa iyang pagpauli paingon sa City of Naga ug nagbawsanay sila og mga matam-is nga pahiyom diha’ng misugod na pagsibog ang gisakyan nga PUJ sa dalaga.

“Pagka suwerte nimo gaw Gerald! Giunsa man nimo nga imong naamiga kadto si Daisy?” gipangutana ni Ruben ang probinsyano niya’ng ig-agaw.

Gisaysayan ni Gerald si Ruben kun ngano nga nasuod niya ang maanyag nga dalaga. Nakapanglingo-lingo si Ruben. “Pilyo ka man ‘sab diay sa tsiks gaw Gerald,” matud ni Ruben samtang nagsakay na sila’g PUJ balik sa dakbayan sa Sugbo.

Mitingog ang selpon ni Gerald. Sa iyang pagtan-aw, si Daisy ang mi-text kaniya ug nagpahibalo nga miabot na siya sa Naga. “Ugma na lang kita manuroy Gerald kay mopahuway ko karon, kapoy kaayo nga wala’y tulog,” ni Daisy.

Nagpahiyom si Gerald nga mi-reply sa text sa dalaga. “Lagmit g’yud nga magkauyab mo niana’ng Daisy gaw,” matud ni Ruben. “Kun mahitabo na bai, isipon nako ang akong kaugalingon nga gisuwerte kay guwapa gud si Daisy,” tubay ni Gerald. (Sumpayan)