Siya ug ako sa kangitngit - Gula 41
Hapit na tunga’ng gabii diha nga nangatulog kami ni Venus.
Pagkaugma, sayo kami’ng miadto sa tindahan. Apan nauna pa namo pag-abot si Godfrey, among kauban sa trabaho.
Namatikdan ko nga lain og tinan-awan si Godfrey nako apan wala lang nako hatagi’g dautang kahulogan ang iyang tinan-awan. Wala ko magpasabot nga gilainan ko sa iyang tinan-awan.
Pagkataud-taod, nahiabot si Mrs. Ramos nga nagdala sa pungpong sa mga yawe sa tindahan. Misunod pag-abot si Cyrus, lain namo’ng kauban sa trabaho. Sila si Godfrey ug Cyrus maoy nagtambayong pagpangabli sa tindahan.
Sa buntag pa, dili pa kaayo daghan ang mga kustomer nga namalit sa tindahan apan dihang nagsingabot na ang kaudtohon, busy na kami kaayo. Nagkapuliki kami’g atiman sa mga kustomer. Kusog kaayo ang pinalitay sa mga baligya sa tindahan.
“Ayaw’g kompiyansa niana’ng Godfrey, sipat kaayo na sa mga babaye” gipahimangnoan ko ni Venus sa among pagpangaon niana’ng pagkaudto.
“Salamat sa imong pahimangno. Mura bitaw og palakero siya’g dagway. Kun makatutok, mura’g molagbas sa atong bukog ang tinan-awan,” matud ko.
Human sa among pangaon, namalik mi ngadto sa tindahan aron pulihan ang tulo namo ka kauban nga maoy nagbantay samtang naniudto mi. Sila na usab ang nangaon. -- Sumpayan
- Latest
