Atol sa sermon sa pari sa iyang misa ning hapona, klarong nabati ni Felix ang gipahimug-atan nga ebanghelyo niini.
“Ning pagsugod sa panahon sa kuwaresma, buhata gayud ninyo ang pag-ampo, pagpuasa ug paghatag-hinabang sa tanang nagkinahanglan. Paghinulsol kamo sa inyong mga sala ug nunti ninyo sa pagkumpisal....!”
Tuod man, human sa hapunong misa sa alas-tres, apil sa naglinya paglingkod si Felix sa tanang mangumpisal sa simbahan sa Santo Rosario. Lima na ka bulan nga wala na siya makakumpisal sa pari ug gusto na niyang malimpiyohan ang iyang kaugalingon sa nahimo niyang sala, sa iyang asawang si Terie ug sa iyang mga anak.
“Ginoo, atol ning pagsugod sa lenten season, gusto ko’ng maghinulsol sa tanan kong mga sala, pinaagi sa pagkumpisal niini sa usa ka pari!” nagkitabkitab ang baba ni Felix samtang apil sa naglinyang mangumpisalay nga naglingkod niadtong hapona.
Usa ka lisensiyadong civil engineer si Felix sa siyudad sa Sugbo nga nagdumala sa usa ka dakong construction firm. Si Terie nga usa usab ka CPA, wala na niya patrabahoa karon nga parehas na silang mitungton sa 55 anyos. Ang dakong binulan nga suweldo ni Felix, pun-an sa ilang savings sa banko, igo na kaayo nga makapaharuhay nilang magtiayon sa ilang pagpuyo, ilabi na nga ang tulo nila ka anak, pulos na usab mga propesyonal ug may mga desenteng trabaho na.
Natental si Felix sa lisensiyadong architect nga si Sonie nga maoy naghimo sa tanang disenyo sa plano sa gidumala niyang dakong construction firm. Guwapa si Sonie ug 40 anyos pa. Minyo na usab kini ug usab ka nautical engineer ang bana, nga magbiyahean ang gisakyang cargo vessel sa lainlaing mga nasud. May duha ka anak si Sonie nga ulitawo ug dalaga na.
Tungod kay guwapo si Felix ug macho ang lawas, nadani gayud niya ang babayeng architect. Parehas sila nga naanod sa tentasyon. Kadaghan na sila nagtagay sa dugamis sa kinawatkawat nga lawasnong kalipay. Apan nakaamgo si Felix. Nakasala siya sa iyang asawa ug mga anak, ilabi na gayud sa Ginoo. Nakahukom siya nga likayan na si Sonie. Maghinulsol siya sa iyang mga sala pinaagi sa pagkumpisal niini.
Mura’g naibtan og tunok ang dughan ni Felix, human sa iyang pagkumpisal niadtong hapona. (Kataposan)