Nalingaw si Daisy pagsud-ong sa mga bata nga gibitay sa daw hayhayan aron nga mahisama sila tan-awon sa mga anghel nga nagdung-aw sa imahen ni Birhen Maria ug ni Hesukristo nga nabanhaw na human kini mamatay.
Apan si Gerald wala kaayo mahimutang. Nabahin ang iyang pagtagad kay gawas sa pagsud-ong sa mabulokong pasundayag sa Sugat sa Pagkabanhaw nga gipasiugdahan sa kaparian ug mga opisyal sa Minglanilla, nadani usab ang iyang pagtagad sa nangalimyon nga kahumot ni Daisy.
“Nindot kaayo Ger no? Kana’ng usa ka bata o, angayan kaayo, mura g’yud og tinuod nga anghel,” matud ni Daisy nga milingi kang Gerald. Wala tuyoa nga nakatutok si Gerald sa puwa kaayo nga mga ngabil ni Daisy nga ingon sa tam-is kaayo nga tambis.
Pabor kaayo ni Gerald pagsud-ong sa tibuok bayhon ni Daisy kay diha man siya magtindog sa likud nga bahin sa dalaga. Gipaubos ni Gerald ang iyang panan-aw ug ang hawak ug sampot ni Daisy maoy iyang gisud-ong.
Ang maayo’ng pagkalalik sa hawak ug sampot ni Daisy maoy daklit nga nakapalimot ni Gerald nga miadto sila didto aron sa pagsud-ong sa sugat. Nakapanglad-ok si Gerald sa iyang mga laway ug nagpamahit sa iyang mga ngabil.
“Lamia g’yud og lawas uy, humot pa g’yud kaayo,” nakapangyamyam si Gerald sa iyang kaugalingon. Dayon nahuman na ang pasundayag sa Sugat sa Pagkabanhaw. “Salamat kaayo Ger ha? Kun wala pa ko nimo pasak-a, dili g’yud kaayo ko makakita sa sugat,” matud ni Daisy.
Mipahiyom si Gerald nga misud-ong pag-ayo sa panagway ni Daisy. “Mag-snack usa ta gaw Ruben, imbitahon nato kini si Daisy kay sayo pa kaayo nga ipauli, ngitngit pa,” matud ni Gerald.
Sa usa ka painitan og puto ug sikwati, nagtupad paglingkod sila si Gerald ug Daisy. (Sumpayan)