Makigbalik ang ex

Dear DJ Jacky G.,

Hangtud karon, nagsige gihapon og communicate nako ang ako’ng ex GF. Ganahan g’yud siya makigbalik. Nag live-in kami sa una.

Dako na g’yud siya’g nagasto nako mao nga maikog ko musulti sa tinuod nga may lain na ko nga uyab ug wala na ko mahigugma niya. Kaikog ug kalooy ang ako’ng gibati karon para niya. Dili ko ganahan nga masakitan siya kay daghan na kaayo siya’g natabang nako Jacky. Unsaon ko man ni karon? Mr. Yukie

* * *

Dear Mr. Yukie,

“The truth will set you free.” Kadugayan, masakpan ra gihapon ka.  Ug sigurado’ng mas masakitan siya kun sa lain pa niya mahibaw-an ang kamatuoran. Buwag na man mo di ba? At least you got past the first and hardest step na. Tell the truth, but break it to her gently. Pasalamat sa tanan niya’ng natabang nimo ug pangayo’g pasaylo. Be sincere. Maklaro baya kun bulatik ra.

Sulti sa tinuod. Hurting her with the truth is better than misleading her with a lie. And make sure to treat your current girlfriend better this time.

Ayaw na palabi’g pagasto ha? Sa mga manag-uyab, bisan pa og ibutang nato nga mas arangan ang usa, angay nga dili pud muabusar ang usa. Timan-i Mr. Yukie, di g’yud ta angay mamentaha ni bisan kinsa, labi na sa uyab. – DJ Jacky G

Siya ug ako sa kangitngit

Ni Rosalie Vallecera

Nakapahiyom ko diha’ng gipanag-ing ko ni Mrs. Ramos sa artista nga si Coleen Garcia.

“Mas guwapa ug mas sexy to siya kay nako, misis,” nako pa nga ingon sa naibtan og tunok. Gipakaingon ko’g nakaila si Mrs. Ramos nako.

Nakamay-ong ra diay siya nako sa panagway sa usa ka artista. Hinuon, makadaghan na ako makadawat sa maong kumento. Daghan ang nag-ingon nga susama g’yud kuno ko’g panagway ni Coleen Garcia.

“Gusto ka ba g’yud nga motrabaho?” gipangutana ko ni Mrs. Ramos.

“Oo, misis. Gusto man gud ko’ng makatabang sa akong mga ginikanan. Lisod ang among kahimtang mao nga wala ko makapadayon og eskuwela sa kolehiyo.”

Sagol bakak na ang akong gisulti aron gayud dawaton ko ni Mrs. Ramos ug makatrabaho sa iyang tindahan. Kinahanglang buhaton ko ang pagpamakak aron maka-survive ko sa siyudad.

“Taga diin ka man diay, Inday?” Laing pangutana ni Mrs. Ramos.

“Taga Alicia,” laing bakak ang akong gitug-an kaniya.

“Unsa gani to’y ngalan nimo?” ni Mrs. Ramos. Human nako gitug-anan si Mrs. Ramos, iya na ko nga gidawat.

“Puwede ka nga mosugod karon dayon,” niya pa. “Ako na’y bahala nga mo-adjust sa imong suweldo,” matud ni Mrs. Ramos. Tuod man, misugod dayon ko sa pagtrabaho.

Lima kami nga trabahante sa tindahan. Duha ang lalaki ug tulo kami’ng mga babaye. Maoy una ko’ng gikaila ug gikasuod si Venus. (Sumpayan)