Gula 35
Sa gawas nga bahin sa tindahan akong nabasa ang karatola, “Wanted Tindera.”
Sa akong pagkabasa niini, mihukom ko’ng dili lang una mopadayon sa pagpangita’g balay nga kapuy-an. Maoy akong unahon ang pag-apply og trabaho sa tindahan og agrivet.
Misulod ko sa tindahan ug mi-inquire. Tayming kaayo nga ang tag-iya mismo sa tindahan maoy akong gikasulti. Gidaygan dayon nako siya nga gusto ko’ng motrabaho isip tindera sa iyang tindahan.
Iya ko nga gidala ngadto sa usa ka air-conditioned nga lawak ug nagsultihanay mi’g maayo. “Mura’g familiar nako ang imong panagway, Inday,” matud ni Mrs. Ramos. Kalit ko’ng gikulbaan sa akong nadungog.
Mibati ko’g kabalaka nga basin nakaila si Mrs. Ramos kanako. Daghan ra ba nga taga Mabini nga nagnegosyo sa Talibon. Tingalig usa si Mrs. Ramos kanila. Basin og nakaila siya sa akong mga ginikanan ug siya’y magbuking sa akong pagtagotago sa Talibon.
Delikado kun matultolan ko nila, ilabi na g’yud ni agaw Paulo. “Ngano man diay, Mrs?” Gisukit ko ang tag-iya sa tindahan nga buot ko’ng aplayan. “Nakaila ka ba nako?”
“Wala,” giubanan og pahiyom ang tubag ni Mrs. Ramos.
“Unya, ngano’ng miingon ka man nga familiar nimo ang akong panagway?” ako siya’ng gipangutana.
“May artista man gud nga susama nimo’g panagway.Pareho gyud mo kaguwapa si Coleen Garcia. (Sumpayan)