Siya ug ako sa kangitngit

Gula 25

Miapas si Paulo kanako sa Tagbilaran. Ako siya nga gipahinumdoman nga dili magbinastos kay dili iyang teritoryo ang maong dapit.

“Way magbuot nako, gaw Monic, tungod kay ako ang tag-iya nimo,” nagkanayon si Paulo.“Kahilas gud nimo?” ako siya’ng gitubag.

“Ayaw na lang pagreklamo kun dili ka buot nga maeskandalo ta dinhi,” iya ko’ng giingnan. Nahilom ko. Gipugngan ko lang ang pag-display sa akong kalagot.

“Ngano’ng wa ka na man mopauli sa ato?” Nangutana si Paulo.

“Busy kaayo ko,” maoy akong tubag. “Daghan kaayo ko’g bulohaton sa eskuylahan. Gawas pa, mahal ang plite gikan dinhi paingon sa Mabini. Nagdaginot ko.”

“Kaha, Monica? Mao g’yud kaha kana ang matuod nga hinungdan nga panagsa ka na lang mopauli sa ato? O duna kay gilikayan?” pintok ang tingog ni Paulo.

“Bahala ka na kun unsa’y imong gihunahuna. Basta nga gisultihan ko na ikaw sa hinungdan kun ngano’ng dili na ko mopauli kanunay didto sa Mabini matag weekend,” matud ko. “Motuo ko sa imong gisulti kun pamatud-an mo kanako nga tinuod kadto’ng tanan mo’ng gipamulong,” ni Paulo pa. “U-unsay buot mo’ng ipasabot?” ako siya’ng gisukna.

“Ugma pa ko mopauli sa Mabini. Gusto ko’ng makigkita ka nako unya’ng gabii didto sa gitsek-inan ko nga hotel.”

Misanting ang akong dalunggan pagkadungog sa gisulti ni Paulo. (Sumpayan)