Ilang mga regalo

Adlaw’ng Sabado. Malipayong nagpaabot si Liza sa iyang bana karong hapona bisan may gamay’ng dag-om nga mihadla sa panahon. Andam na ang gitagana niyang pagkaon nga ilang saw-an agi’g pagsaulog sa dungan nilang adlaw nga kasumaran.

Nalipay si Liza nga natumong sa Sabado ang  ilang adlaw. Adlaw nga ipauli ni Boy nga iyang bana gikan sa siyudad sa Sugbo. Tunga sa adlaw ang trabaho  nilang  Boy matag Sabado. Mao nga moabot siya sa barangay Lepanto sakop sa lungsod sa Alegria nga dili pa mosalop ang adlaw. “Happy birthday, love!” sugat timbaya ni Liza sa dihang miabot si Boy.

“Happy birthday, sab love!” tubag ni Boy nga way kadasig.

May luhang mibiaw sa mga mata ni Boy dihang nakita niya ang buhok ni Liza. Nahanaw ang bulawanong bayhon sa buhok ni Liza. Iyang gipaputol ang taas niyang buhok nga nakadani ni Boy kaniadtong nanguyab pa siya.   “Love, ampingi ang nindot nimong buhok nga mibagay sa imong kaanyag,” pahimangno ni Boy sa bag-o pa silang kasal.

“Tumanon ko, love, alang sa kalungtaran sa atong kaminyuon,” ni Liza.

May duha na silang anak sa lima ka tuig nilang panagtiayon. Upat ka tuig ang panuigon sa maguwang ug duha ka tuig ang manghod. Tigom sa salapi ilang gihimo alang sa kaugmaon sa ilang mga anak. Gani wa padayuna ni Boy ang iyang tinguha nga makabaton og selpon.

“Wa kay timik, love, ug aduna pay luha ang imong mga mata. Nasuko ka, nako,” sukna ni Liza sa kahingawa.

“Wa ko masuko, love. Sayang lang ang mahalong sudlay nga akong regalo nimo, alang sa nindot  nimong buhok,” mahay ni Boy ngadto ni Liza.

“Sori love, gipaputol ko ang taas nakong buhok bugti sa dakong kantidad nga akong gipalit sa iregalo kong selpon nimo,” pasabot ni Liza.

Nakasabot si Boy sa gibuhat ni Liza. Gitawag ni Liza ang mga bata aron saw-an ang gitaganang pagkaon. Sa gawas wala nay dag-om nga mihadla sa panahon. Gibanlas sa hangin pahilayo. (Katapusan)