Gula 5
Nahakatawa si Janeth diha nga mipadungog-dungog si Jeffrey nga nakagusto kini kaniya. “Puwede ba nga magkita ta Neth kun wala kay klase?” giingnan sa ulitawo ang dalaga.
“Sige, unya na lang sa Sabado after sa akong 5 p.m. nga klase,” matud ni Janeth nga nagpadayag nga uyon siya nga magkita sila si Jeffrey.
Mihari usa ang kahilom kanila’ng duha. Mura’g naghuwat kun kinsa kanila ang mouna sa pagsulti. Hangtud nga napugos si Jeffrey sa pagtingog. “I hope Neth nga unya sa Sabado maangkon ko na ang imong gugma.”
Mikatawa na ‘sab si Janeth nga nakadungog sa gisulti ni Jeffrey nga mura’g seryoso na kaayo sa iyang pagpanguyab sa dalaga. “Paspasa diay gud nimo nga manguyab Jeff.. express ka man kaayo,” matud ni Janeth.
Nananghid si Janeth kang Jeffrey nga dili siya makadugay og estorya kay exam niya inigkaugma mao nga kinahanglan pa siya nga magtuon. “Bye, Jeff, see you on Saturday,” matud sa paraygong tingog ni Janeth.
Nahinuktok makadiyot si Jeffrey nga naghuna-huna. Nalipay siya kay nakapadayag na siya sa iyang gibati kang Janeth ug nga ang iya na lang himuon mao ang pag-follow up.
Apan natingala siya sa gipakita’ng taras kaganina ni Janeth nga gikataw-an lang siya human niini mabati ang iyang paglitok nga nahigugma siya ngadto sa dalaga.
Sa iyang pagbana-bana, mura’g wala motuo kaniya si Janeth mao nga ingon sa gibugal-bugalan lang siya pinaagi sa pagsige’g katawa.
Nalipay hinuon si Jeffrey kay misugot si Janeth nga magkita sila sa Sabado.
Plano ni Jeffrey nga dili gayud niya lung-an si Janeth hangtud nga mosugot kini kaniya atol unya sa ilang panagkita. (Sumpayan)